Արդեն հայտնել ենք, որ այս գիշեր՝ Ալեք Մանուկյան փողոցում գտնվող «Տոտո Գեյմինգ» գրասենյակի դիմաց ծեծի են ենթարկել «Պանտեռա» անվտանգության ծառայության աշխատակից Վարազդատ Խոցանյանին, ով հայտնի է Հայաստան այցերի ժամանակ մի քանի հայտնի անձանց՝ այդ թվում Քիմ Քարդաշյանի և նրա ընտանիքի անվտանգությունն ապահովելով:
«Պանտեռա սիքյուրիթի» անվտանգության ծառայություն մատուցող ընկերության ղեկավար Վահե Դարբինյանը Asekose.am-ի հետ զրույցում ասաց, որ Վարազդատ Խոցանյանն ախալքալակից է և նրան ծեծի ենթարկողները ևս ախալքալակցիներ են եղել:
«Նրանցից մեկը ճանաչել է Վարազդատին ու խոսակցություն է բռնվել, թե դու ինձ ճանաչում ես, չես ճանաչում և դրա պատճառով սկսել են վիճաբանել: Սկզբից մեկը հետևից ծանր առարկայով խփել է գլխին, հետո մյուսները սկսել են, այսպես ասաց, «վրայով վազել»»,-նշեց Դարբինյանը:
Նրա խոսքով` վիճաբանության արդյունքում Վարազդատ Խոցանյանը ստացել է ուղեղի ցնցում և ծնոտի կոտրվածք, բազմաթիվ սալջարդեր: Այժմ Վարազդատը գտնվում է վերակենդանացման բաժանմունքում: Գիտակցությունը տեղն է:
Հեղինակ՝ Ատոմ Գրիգորյան
