Օրերս «Արմենիա» հեռուստաընկերությամբ ցուցադրվող «Հայասատանի ձայնը» նախագիծը լքեց մասնակիցներից Գևորգ Մարտիրոսյանը: Նախագծից նրա դուրս գալը երկրպագուների և հեռուստադիտողների շրջանում քննադատությունների մեծ ալիք բարձրացրեց, քանի որ Գևորգը պոտենցյալ հաղթողների շարքում էր:
Նա այն մասնակիցներից էր, ում մարզիչներն ու դահլիճը ծափահարում էին հոտնկայս: Հենց կույր լսումների ժամանակ Գևորգին կատարման առաջին նոտաներից երգչուհիներ Սոնան ու Սոֆին միանգամից ընտրեցին, արագ արձագանքեց նաև երգիչ Թաթան: Մարզիչների միջև սկսվեց պայքար: Սոֆին խնդրեց միանալ իրեն, Սոնան գովաբանեց Գևորգի ազատ բեմական պահվածքը: Գևորգը դիմեց կնոջը, ով դահլիճից հուշեց ընտրություն կատարել հօգուտ Թաթայի:
Իսկ արդեն եզրափակչին ընդառաջ տեղի ունեցած համերգից հետո, երբ Թաթան պետք է ընտրություն կատարեր, թե ով է մնում նախագծում` Իսկուհին, թե Գևորգը, ընտրեց Իսկուհուն: «Քվեարկության ձայները գրեթե հավասար էին, որոշիչը Թաթայի որոշումն էր: Թաթան եթերում բացատրեց, որ ցանկանում էր ձայների հարաբերակցությունը բալանսի բերել, մտածում էր, որ Գևորգի ձայնը շատ կլիներ: Կարծում եմ, որ ինքն էլ տրամադրված չէր, որ Գևորգը դուրս մնա նախագծից: Ես հավատում եմ նրան»,- ASEKOSE.am-ի թղթակցի հետ զրույցում պատմեց Գևորգի պրոդյուսեր Սամվել Ղազարյանը:
Իսկ ինքը` Գևորգը, համարում է, որ նախագծում պարզապես իր բախտը չի բերել: «Այդ պահին փոքր-ինչ անկանկալի եկա, բայց դա անցավ: Ամեն ինչ նորմալ է: Ինձ թվում է թյուրիամցություն է եղել: Այլ կերպ ասած` բախտս չբերեց»,- ժպտալով նշեց Գևորգը:
Նրա պրոդյուսերը պատմում է, որ մինչև հիմա էլ այն հանդիսատեսները, ովքեր հավատում էին Գևորգի ուժերին, նրա կողքին են և նշում են, որ իրենց համար հենց Գևորգն է հաղթողը:
«Երկրպագուներն արդեն մի քանի օր է, ինչ աընդհատ գրում և հետաքրքրվում են, թե ինչու այդպես եղավ, չի կարող այդքան անարդար լինել և այլն: Դրան մենք պատասխանում ենք, որ ուղղակի չգիտենք, թե ինչ եղավ: Նրանց հետ կապված զվարճալի դեպքեր էլ են եղել: Օրինակ` մի անգամ նրանք իմացել էին Գևորգի աշխատավայրը, եկել այնտեղ և ոգևորիչ գրառումներ պարունակոց ցուցանակներով Գևորգին ուրախացրել»,- պատմեց Ս. Ղազարյանը:
Եվ նա, և Գևորգը նշեցին, որ նախագծի մասնակիցների և ժյուրիի անդամների հետ լավ հարաբերությունների մեջ: «Նախագիծը ոչ միայն ինձ, այլև շատ մասնակիցների հնարավորություն տվեց ճանաչություն ձեռք բերել, ինչը յուրաքանչյուր արտիստի համար կարևոր է: Երբ ես գնացել եմ այս նախագիծը, ի սկզբանե ոչ մեկին ոչինչ չեմ ուզել ապացուցել, ուղղակի իմ համար դա փորձ ձեռք բերելու մեծ հնարավորություն էր: Ամեն դեպքում, անկեղծ ասած, չէի սպասում, որ եզրափակիչ դուրս չեմ գալու»,- անկեղծացավ Գևորգը:
Նա պատմեց, որ «Հայաստանի ձայնը» նախագծին մասնակցել է բազմաթիվ ընկերների և պրոդյուսերի հորդորով: «Անկեղծ ասած` սկզբում չէի ուզում մասնակցել, բայց հետո հասկացա, որ այս ամեն ինչը ինձ պետք էր»,- նշեց նա:
Գևորգը երաժշտական կրթություն է ստացել դեռ մանկուց: Հրազդանի արվեստի դպրոցում ջութակ նվագել է սովորել: «Բանակից վերադառնալուց հետո ընդունվել եմ Երգի պետական թատրոն, սովորել եմ, այդտել ստացել եմ վոկալային կրթություն: Այնտեղ ոչ միայն սովորել եմ, այլև` աշխատել որպես մեներգիչ: Հանգամանքների բերումով հետո դուրս եմ եկել և իմ անհատական գործունեությամբ եմ զբաղվում»,- պատմեց Գևորգը:
Ի դեպ, նա պատրաստվում է հանդիսատեսին նոր տեսահոլովակ ներկայացնել: «Կան նոր երգեր, որոնք պատրաստվում ենք ներկայացնել: Կա երգ, որի հիման վրա շուտով տեսահոլովակ է նկարահանվելու, երևի թե` մայիս ամսին արդեն կներկայանամ այդ տեսահոլովակով»,- տեղեկացրեց նա:
