▲ Դեպի վեր

lang.iso lang.iso lang.iso

Հոլիվուդյան աստղերը վստահում են մեր հայրենակից Սիլվա Չաքմաքչյանին

Երևի քչերը գիտեն, որ հոլիվուդյան քմահաճ աստղերից շատերն իրենց բեմական հագուստների պատրաստումը վստահում են մեր հայրենակից Սիլվա Չաքմաքչյանին:

Բանկային գործ սովորած Սիլվան մոտ 40 տարի առաջ առանց վարանելու թողեց իր մասնագիտական աշխատանքն ու սկսեց զբաղվել նորաձևությամբ: Աշխատասիրությունը նրան շուտով տվեց առաջին դրական արդյունքները` Սիլվան հիմնադրեց սեփական կարի արհեստանոցը և ամեն ինչ այդտեղից էլ սկսվեց:

Հիմա Սիլվա Չաքմաքչյանը լոսանջելոսյան Silvias Costumes բրենդի հիմնադիրն է: Այստեղ աշխատում են ամերիկաբնակ շատ հայեր, ուր հիմնականում իշխում է հայկականը:

«Առաջին հերթին աշխատանքի եմ ընդունում հայերին, որովհետև նրանք ձեռքի յուրահատուկ շնորհք ունեն, հենց նրանց շնորհիվ է, որ իմ արվեստանոցն այսպիսի տեղ է գրավում Միացյալ նահանգներում»,-նշում է Սիլվա Չաքմաքչյանը:

Նրա խոսքով իրենց մոտ աշխատանքային գրաֆիկ չկա, գիշեր և ցերեկ հաշվի չեն առնվում, եթե կա պատվեր, ապա բոլորը մեկ մարդու նման ներկայանում են աշխատանքի և հենց այստեղ է թաքնված Silvias Costumes-ի հաջողության գրավականը:

Իսկ այս բրենդի հաջողությունն ամենևին էլ տեսական ու բառերով չէ: Բավական է միայն նշել, որ մեր հայրենակցուհու մշտական հաճախորդների թվին են պատկանում այնպիսի համաշխարհային շոուբիզնեսյան աստղեր, ինչպիսիք են Ջանեթ Ջեքսոնը, Շերը, Ռիհաննան, Ջենիֆեր Լոպեսը, Քեթի Փերին, Արիանա Գրանդեն, Դայանա Ռոսը, Դոլի Փարթոնը և ամեն ինչ ավելի քան պարզ է դառնում:

«Այս մարդկանց հետ շատ հեշտ է աշխատելը, նրանք գալիս են մեզ մոտ պատվերը տալիս են, հետո մտերմանում ենք, պարում, ուրախանում իրենց զգեստը վերցնում գնում են»,-պատմում է նա: 

Սիլվա Չաքմաքչյանը բացի հաջողակ գործարար կին լինելուց` նաև բարերար է, սակայն միշտ նախընտրում է այս մասին չբարձրաձայնել:

«Եթե ես մեկի համար մի լավ գործ եմ անում, կամ օգնում եմ այդ մասին իմանում են երկու հոգի` ես և նա, և դա բավարար է, սա է իմ կյանքի սկզբունքը»,-ընդգծում է տիկին Չաքմաքչյանը:

Իբրև գործարար կին` մեր հայրենակցուհին բազում պարգևներ է ստացել, այդ թվում` ԱՄՆ նախագահ Բարաք Օբամային կողմից: Արամ Առաջին կաթողիկոսի կողմից էլ տիկին Սիլվան արժանացել է «Կիլիկյան ասպետ» շքանշանին` իր իսկ հիմնած «Գառնի» հաստատության միջոցով տարիներ շարունակ աշխարհասփյուռ հայության նու հատկապես հայրենիքին ուղղած սրտաբուխ նվիրատվությունների համար:

Սիլվա Չաքմաքչանի հետ հետաքրքիր զրույցի ամբողջական հեռուստատեսային տարբերակը կարող եք դիտել կիրակի օրը Asekose.am-ի «Բացարձակ արժեք» հաղորդման շրջանակներում:

Վերահրապարակումներում` մտքերն ու ինֆորմացիան կարող են չհամընկնել խմբագրության տեսակետի հետ: Ձեր տեսակետը կամ հերքումը կարող եք ուղարկել info@asekose.am-ին
Շոու-բիզնես ավելին