Ըստ Asekose.am-ի ունեցած տեղեկությունների` «Հայաստանի Ձայնը» նախագծի 3-րդ եթերաշրջանի մարզիչներից 3-ը լինելու են Եվա Ռիվասը, ով, ի դեպ, երեկ երեկոյան իր Instagram-ում տեղադրել էր լուսանկար, որտեղ նշվում էր այդ մասին, Սոնան և Հայկոն, ովքեր արդեն իսկ փորձ ունեցել են նախկին եթերաշրջաններում որպես մարզիչ հանդես գալու: Լուրի իսկությունը ճշտելու համար Asekose.am-ի թղթակիցը կապվեց նախագծի քասթինգ պրոդյուսեր և երաժշտական մասի պատասխանատու Ալեքսանդր Մհերյանի հետ:
Խուսափելով տալ որևէ հստակ պատասխան` Ալեքսանդր Մհերյանը նշեց, որ մինչ նախագծի պաշտոնական անոնսի եթեր հեռարձակվելը նա ոչ մի տեղեկություն հաղորդել չի կարող.
«Հայաստանի ձայնը» նախագծի անոնսը եթեր կհեռարձակվի մի քանի օրից և հենց այդ ժամանակ էլ մենք կհայտարարենք մրցույթի մանրամասները»,- ասաց նախագծի երաժշտական մասի պատասխանատուն:
Ինչ վերաբերում է Եվա Ռիվասի կողմից հրապարակած լուսանկարին, որն, ի դեպ, արդեն հեռացվել է երգչուհու Instagram-ից, Ալեքսանդր Մհերյանը կրկին անգամ հրաժարվեց պատասխանից` նշելով, որ այդ ամենի պաշտոնական հայտարարումը կլինի միայն «Արմենիա» հեռուստաընկերության եթերով:
Asekose.am-ի թղթակցի հետ զրույցում Ալեքսանդրը նշեց, որ այս եթերաշրջանում բավական անակնկալներ են սպասվում հեռուստադիտողներին: Անականկալները լինելու են թե մասնակիցների, թե մրցավարների և թե երգացանկի առումով:
Տեղեկացնենք, որ Հայաստանի ձայնը նախագծի 3-րդ եթերաշրջանը մեկնարկելու է հոկտեմբեր ամսին, իսկ նախագծի մասնակիցների հայտերի ընդունումը շարունակվելու է մինչ սեպտեմբերի 2-ը:
Անդրադառանալով նաև նախագծի երաժշտական պրոդյուսեր Իրինա Վարդանյանի` ամիսներ առաջ Asekose.am-ին տված այն տեղեկությանը, որ հոկտեմբեր ամսին նախատեսվում էր անցկացնել մանկական The Voice-ը, Ալեքսանդր Մհերյանն ասաց.
«Քանի որ նախկին երկու եթերաշրջանները բավական լավ արձագանքներ էին ունեցել, որոշվեց անցկացնել նածագծի 3-րդ եթերաշրջանը, ընդամնեը այդքանը»:
Իսկ թե արդյո՞ք առաջիկայում Հայաստանում կանցկացվի մանկական The Voice-ը, Ալեքսանդր Մհերյանը պատասխանեց, որ դեռևս կազմակերպիչների կողմից նախատեսվում է անցկացնել միայն մեծահասակների համար նախատեսված «Հայաստանի ձայնը»:
Ավելացնենք, որ ըստ Asekose.am-ի ունեցած տեղեկությունների` նախագծի 4-րդ մարզիչը կոմպոզիտոր, երգահան Արմեն Մարտիրոսյանն է:
Հեղինակ` Սաթենիկ Խաչատրյան
