bravo.am-ը գրում է. Հայաստանում ընթերցանությունը խրախուսելու նպատակով Ժամանակակից արվեստների միության «Խորհուրդ են տալիս հայտնիները» նախաձեռնությանը միացել է նաեւ Սիլվա Հակոբյանը: Երգչուհին օրերս ընթերցասերների հետ քննարկել է Միգել դե Ունամունոյի «Մառախուղը» վեպը` իր ընտրությունը մեկնաբանելով այսպես.«Մանուկ Նիգոյանը շատ գրքեր առաջարկեց, ամեն մեկի մասին մի փոքր պատմեց, եւ քանի որ սիրավեպերի սիրահար եմ, ընտրեցինք այս գործը, ինչի համար շատ ուրախ եմ»:

Սիլվան, ներկայացնելով «Մառախուղ»-ի սյուժեն, ասել է, որ այն կին-տղամարդ հարաբերությունների, սիրո եւ բաժանության մասին է, մեկնաբանել է հերոսների քայլերը, նաեւ նշել, թե որ պարագայում ինքն ինչպես կվարվեր.«Իմ ամենաչսիրած բանը սուտն է: Անընդունելի եմ համարում հերոսուհու պահվածքը. նա ամեն կերպ օգտագործում է Ավգուստոյին եւ գաղտնի հեռանում: Ավելի լավ է` անկեղծ լիներ, խոստովաներ, որ չի սիրում, քան խաբեր եւ հարսանիքի օրը փախչեր»:

Երգչուհին համակարծիք է հեղինակի այն տեսակետին, որ սերը դադարում է սեր լինել, երբ այն բացատրում են.«Սա գրքում տեղ գտած այն տողերից է, որը ես առանձնացրել եմ: Եթե մարդն իրոք սիրում է, երջանիկ է, կարիք չկա դրա մասին ասել, բարձրաձայնել.  աչքերից էլ երեւում է»:

Սիլվան կարծում է, որ այսօր հազվադեպ երեւույթ են իրական զգացմունքներն ու հարաբերությունները: Հարցին, թե ինչպիսին է իր եւ ընտրյալի սերը, նա պատասխանել է. «Իմ դեպքում իսկական է: Ես սիրել ու շարունակում եմ սիրել սրտով: Ուրիշ ոչինչ չի եղել, որի վրա հիմնվելով կ3րող էինք կառուցել մեր հարաբերությունները: Սիրուց բացի ամեն բան անցողիկ է»:

Նա հավանել է նաեւ հեղինակի այն միտքը, որ ընտրյալին ճանաչելու ամենալավ միջոցն ամուսնանալն է.«Դրանից հետո շատ-շատ բաներ ջրի երես են դուրս գալիս: Իմ ամուսնացած ընկերներից շատ եմ լսել, որ ամուսնանալը հեշտ է, իսկ ամուսնացած լինելը` ոչ:)»:

Սիլվան կարծում է` միանման մտածելակերպ ունեցող զույգերն ավելի քիչ են վիճում, հետեւաբար, ավելի երջանիկ են: Հարցին` որքանով են ինքն ու սիրելին իրար նման, եւ արդյոք քիչ են վիճում, նա պատասխանել է.«Մենք գրեթե միշտ համակարծիք ենք: Ոչ հաճախ, բայց վիճում ենք ինչպես բոլոր նորմալ զույգերը: Եթե այդ վեճերը չլինեն, կյանքն անհետաքրքիր կլինի»:

Երգչուհու պրոդյուսեր հայրիկը, ով նույնպես ներկա էր քննարկմանը, չհամաձայնելով դստեր հետ, նշել է.«Որպես կյանքի ճանապարհ անցած մարդ` կասեմ, որ ամուսինները պետք է իրար նման չլինեն, դա ձանձրացնող է: Նրանք պետք է հաճախ վիճեն ու բարիշեն, որ խոսելու, քննարկելու թեմա ունենան»:     Հակադարձելով հայրիկին` Սիլվան ասել է.«Ես վիճող զույգերի չեմ սիրում, պապ:)»:

Մանրամասները սկզբնաղբյուր կայքում