«Ինձ երբեք քննադատությունները չեն կարող խոցել, ես այնպիսին եմ, ինչպիսին կամ, ինձ սիրողը սիրում է, իմ աշխատանքը գնահատում է, իսկ չսիրողը՝ ոչ, ինչ էլ անեմ, միևնույն է քննադատության կարժանանամ»,-Asekose.am-ի հետ զրույցում անկեղծացավ երգչուհի Նանան՝ անդրադառնալով իր ՝մշտապես քննադատված լինելու փաստին: Ավելին՝ երգչուհին շնորհակալություն հայտնեց իրեն քննադատողներին ու իր հասցեին չարախոսներին.
«Կարող է չհավատաք, բայց ես շնորհակալ եմ մարդկանց, ում շնորհիվ կայքերի լրահոսներում եմ հայտնվում գրեթե մի քանի օրը մեկ անգամ: Ստացվում է, որ միշտ ուշադրության կենտրոնում եմ: Բլոգերները տարածում են 14 տարվա վաղեմություն ունեցող լուսանկարներս ու խոսում իմ՝անճաշակ հագուստից այն դեպքում, երբ տվյալ ժամանակ այդ հագուստն ու առհասարակ իմ կերպարը շատ մոդայիկ է եղել»:
Նանան խոսեց նաև այն մասին, որ իրեն մեղադրում են վատ ֆոտոշոփի մեջ.
«Ֆոտոշոփ եմ անում, թե ֆոտոշոփ չեմ անում, դա իրենց խնդիրը չէ: Թող խոսեն այն, ինչ ուզում են: Նրանք ուղղակի չեն պատկերացնում, որ թե՛ լավ, թե՛ վատ խոսքերով ինձ միշտ հիշում են ու իմ մասին հիշեցնում են բոլորին»:
Նանան զրույցում պատմեց նաև նոր տեսահոլովակի մանրամանսերի մասին.
«Իմ նոր տեսահոլովակում ես ինքս եմ ներկայացել հարսի կերպարում, բայց դա միայն դեր է, որը կատարել եմ: Տա Աստված, շուտով իսկապես հարսիկ լինեմ, և որ ամենակարևորն է երջանիկ հարսիկ: Երաժշտության հեղինակը ես եմ, խոսքերն էլ մասամբ ես եմ գրել, բայց Արմենը Խալխասյանն ինձ շատ է օգնել: Տեսահոլովակիս ռեժիսորն Արեն Բայադյանն է: Գլխավոր մտահղացումն իմն է եղել, սակայն ինձ հետ շատ պրոֆեսիոնալ թիմն է աշխատել, ինչի արդյունքը շուտով հնարավորություն կունենաք տեսնել: Ստացվել է այն, ինչն ես իսկապես ուզում ու պատկերացնում էի»:
Նանան թեպետ ուշադրություն չի դարձնում քննադատություններին, այնուամենայնիվ, վստահ է, որ նոր տեսահոլովակը չի քննադատվի.
«Եթե անկեղծ ասեմ, շատ ջերմ, գեղեցիկ տեսահոլովակ է: Չկան բաց տեսարաներ, որոնք կարող են աչք ծակել ու քննադատությունների առիթ հանդիսանալ: Այնուամենայնիվ, եթե նույնիսկ քննադատվեմ, միևնույն է, չեմ անհանգստանա, քանի որ ինձ համար քննադատությունը մի բան է, որը չի կարող չլինել: Ինչպես ուտեստը պիտի համեմունք ունենա, այնպես էլ արվեստագետները պետք է միշտ քննադատվեն»:
Խոսելով ապագա ծրագրերի մասին` երգչուհին ասաց, որ պատրաստվում է նոր ձայնասկավառակ թողարկել.
«Եթե այս տարի չհասցնեմ, ապա գարնանն անպայման կթողարկեմ նոր ձայնասկավառակս: Նոր երգեր պետք է ներկայացնեմ երկրպագուներիս: Բացի այդ շարունակվում են համերգային շրգայություններս տարբեր երկրներում: Ակտիվ աշխատում ենք ու բուռն գործունեություն ծավալում»:
Հեղինակ՝ Ա.Հարությունյան
