Դիտեք նաև՝
«Հուսով եմ առաջինն ու վերջինն է»,-Asekose.am-ի հետ զրույցում ասաց դերասանուհի Նաիրա Մովսիսյանը` անդրադառնալով այն փաստին, որ արհեստական միջամտությամբ փոխել է շրթունքների ձևը: Դերասանուհու խոսքով` մինչ այդ երբեք չի դիմել պլաստիկ կամ այլ միջամտության` արտաքինի մեջ որևէ բան փոխելու նպատակով:
«Շատ էի լսել բժիշկ Սուրեն Աբրահամի մասին: Անընդհատ ուզում էի ինչ-որ մի բան անել, երկար նայում ու չէի հասկանում, ապա մտածեցի, որ կարելի է փոխել շրթունքներիս ձևը` գծագրել և ավելի գեղեցիկ սարքել: Ես պարզապես մի փոքր կլորացրել եմ շուրթերիս չափսը, մեծ փոփոխության չեմ դիմել և շատ գոհ եմ արդյունքից: Բժիշկս էլ ասաց, որ գեղեցիկ շուրթեր ունեմ և այնպես կանի, որ ամեն ինչ լինի շատ բնական և գեղեցիկ»:
Զրույցի ընթացքում Նաիրան ասաց, որ այլևս այլ միջամտության դիմելու ցանկություն չունի.
«Ես վստահեցնում եմ, որ այլ միջամտությունների չեմ դիմի: Նույնիսկ այս որոշումն եմ շատ արագ կայացրել: Նախ գնացել էի ծանոթանալու բժշկի հետ, ապա հենց տեղում առաջարկեցի շրթունքներիս հետ ինչ-որ մի բան անել: Ես բժշկիս ասացի, որ առանց շրթներկի շրթունքներս ճաքճքում են, ինչի վերաբերյալ ասաց, որ ամեն բան կկարգավորի»:
Այն դիտարկմանը՝ արդյո՞ք իր արտաքինի հետ կապված որևէ բարդույթ ունի, դերասանուհին պատասխանեց հետևյալ ձևով.
«Եթե նայեք իմ նկարները, կարծում եմ, որ կհասկանաք, որ ինչպես կարող է կինն այս գեղեցիկ արտաքինով բարդույթ ունենալ` այն դեպքում, որ այս ամենն իրեն տրվել ի ծնե` ծնողների և Աստծո կողմից»:
Նաիրա Մովսիսյանը զրույցի ընթացքում նաև անկեղծացավ, թե ինչու է թույլ տվել ամբողջ ընթացքը տեսանկարահանել և այդ ամենն իր միկրոբլոգերում հրապարակել, այն դեպքում, որ շատ այլ հանրային մարդիկ նախընտրում են նման միջամտությունները և վիրահատությունները գաղտնի պահել:
«Մարդիկ կան, ովքեր իրենց տեսակով չեն ուզում այդ մասին խոսել, բայց դա, թերևս, միայն Հայաստանում, որովհետև մյուս երկրներում դեռ մի բան էլ գովելի է, որ կինն իրեն խնամում է: Այս ամենը, իհարկե, պետք է չափ ունենա. կան բաներ, որոնք կարելի է շտկել օրինակ` մարզասրահ հաճախելով: Իհարկե, կան նաև մարդիկ, ովքեր իսկապես բարդույթ ունեն իրենց արտաքինի հետ կապված: Եթե դու զգում ես, որ ինչ-որ մի բան քեզ խանգարում է, ինչու չանել, ինչու տարիների կորուստ ունենալ, եթե դա կարող ես մեկ վայրկյանում շտկել ու ապրել՝ ինքդ քեզնից գոհ լինելով: Ինչ վերաբերում է տեսանյութի և լուսանկարի հրապարակմանը, ապա ամեն ինչ շատ արագ եղավ, և դրանում որևէ արտառոց բան չկա: Ամեն ինչ շատ գեղեցիկ է ստացվել, բացի ինձնից բոլորն են այդ մասին ասում` նշելով, որ վաղուց պետք է գնայի այդ քայլին»,-իր խոսքը եզրափակեց Նաիրա Մովսիսյանը:
Հեղինակ` Լիլիթ Հակոբյան
Կարդացեք նաև` Նախկին ամուսինս խոստովանել է, որ սկզբում ցանկանում էր PR-վել իմ շնորհիվ. Նաիրա Մովսիսյան
