Life.panorama.am-ը գրում է. Այս Ամանորը փարիզաբնակ երգչուհի Արեւիկ Ալավերդյանի համար  խորհրդանշական է եղել` նա առաջին անգամ աշխարհի ամենաընտանեկան տոնը դիմավորել է լիարժեք ընտանիքով` ամուսնու ու մեկ ամսական որդու հետ.

«Առաջին Ամանորն է, որ դիմավորեցինք մեր փոքրիկ ընտանիքով. Դա գիտակցելը պարզապես հրաշալի է: Չնայած նրան, որ Նոր տարվա գիշերը` 12 զանգերի ժամանակ փոքրիկս անուշ քուն էր մտել, քանի որ դրանից րոպեներ առաջ հայրիկը նրան քնեցրեց, սակայն մենք Նոր տարին շատ բարձր տրամադրությամբ դիմավորեցինք: Այդ օրը մեր ընկերներից մեկի տանը նշեցինք, ուր շատ հաճելի միջավայր է. Տարվա գլխավոր տոնը անցկացրինք թեեւ Փարիզում, սակայն հայկական մթնոլորտում»,- կայքի հետ զրույցում պատմել է Արեւիկ Ալավերդյանն ու նշել, որ ֆրանսիաբնակ հայերը տոները նշում են հայկական տարբերակով.

«Ֆրանսիացիների հետ երբեք Ամանորը չեմ նշել, չգիտեմ էլ նրանց ավանդույթները այդ օրվա հետ կապված, միայն գիտեմ, որ նրանք եւս շատ ուրախ են նշում այդ օրն ու եզրափակվում միայն մեկ օրով: Դե իսկ մենք` հայրես, տոներին պատրաստվում ենք հայերին հատուկ տարբերակով, սակայն նշում ենք առավելագույնը 2-3 օր, ինչը կարծում եմ, շատ լավ  է: Չեմ սիրում, երբ օրերով շարունակվում են տոնական եռուզեռը»,- հավելել է նա:

Խոսելով մեկ ամսական որդու` Դավիթի մասին, Արեւիկը ժպիտով պատմել է իրենց ընտանիքում տիրող մթնոլորտի մասին.

«Դավիթը շատ համով բալիկ է, նա ասես ամեն օր է փոխվում: Կարող եմ ասել, որ տղաս հանգիստ բալիկ է, եթե անհանգստացնող ոչինչ չլինի, լաց չի լինի: Սիրում է ուտել ու քնել: Նաեւ շատ շարժուն է, կարծում եմ` ապագայում աշխույժ է լինելու»,- պատմել է երջանիկ մայիկը:

Ամբողջական նյութը՝ սկզբնաղբյուր կայքում