Աշխարհահռչակ «SOAD» ռոք խմբի մեներգիչ Սերժ Թանկյանն Արցախից լուսանկարներ է հրապարակել: Դրանցից մեկում երգիչը կանգնած է «Ազատ Արցախը ողջունում է Ձեզ» ցուցատախտակի կողքին: Instagram-ի իր էջում Սերժ Թանկյանը գրել է. «Հարգանքներով`Արցախի սահմանից»,- ապա անգլերենով թարգմանաբար ներկայացրել է, թե ինչ է գրված ցուցատախտակին:
Լուսանկարներից մեկում էլ Սերժ Թանկյանն Արսինե Խանջյանի, Ատոմ Էգոյանի և Էրիկ Նազարյանի հետ Շուշիի Ղազանչեցոց եկեղեցում է: Երգիչը նշել է, որ կարոտելու է բոլոր պահերը, որոնք միասին անցկացրել են այնտեղ, ապա շնորհակալություն է հայտնել, որ իրենց ձայնը տեղ է հասել, և իրենք դարձել էին անկախ դիտորդներ:
«Մենք դեռ շատ անելիք ունենք, որպեսզի մի օր ունենանք ազգի այն մոդելը, որի մասին երազում ենք»,-լուսանկարին կից գրել է երգիչը:
Հավելենք, որ Սերժ Թանկյանը հրապարակել է նաև 80-ամյա արցախցի կնոջ հետ լուսանկար` հայտնելով, որ վերջինս ազգային երգ և պար է ներկայացրել իրենց համար:
