Օրերս ռուսական շոու բիզնեսի ամենահայտնի և պահանջված երգչուհիներից մեկը՝ Նյուշան, ներկայացրեց իր նոր՝ «Тебя любить» տեսահոլովակը: Այս անգամ երգչուհու տեսահոլովակը և հատկապես երգն առանձնանում են նրանով, որ դրա գործիքավորումը կատարել են հայ մասնագետներ, մասնավորապես՝ Լազզարոն և Մարտին Միրզոյանը:
Asekose.am-ը կապ հաստատեց Լազզարոյի հետ՝ զրուցելու Նյուշայի հետ համագործակցության, հետագա աշխատանքների և ռուսական շոու բիզնես մուտք գործելու մասին:
Խոսելով Նյուշայի հետ համագործակցության գաղափարի մասին՝ Լազզարոն պատմեց, որ երգչուհու պրոդյուսերը կապ է հաստատել իր հետ, երբ լսել է ռուս երգչուհիներից մեկի ստեղծագործությունը՝ Լազզարոյի գործիքավորմամբ.
«Դեռ մի քանի տարի առաջ համագործակցել եմ ռուս երգչուհիներից մեկի հետ, ում երգը թողարկվելուց հետո է սկսվել իմ աշխատանքը Նյուշայի հետ: Լսելով տվյալ ստեղծագործությունը՝ Նյուշայի պրոդյուսերը կապ հաստատեց ինձ հետ և առաջարկեց համագործակցել»,- նշեց Լազզարոն՝ տեղեկացնելով, որ սա, որպես այսպիսին, կարելի է համարել իրենց համատեղ առաջին համագործակցությունը:
Լազզարոն տեղեկացրեց նաև, որ այս ընթացքում զբաղվել է Նյուշայի մի քանի այլ երգերի գործիքավորումներով ևս, որոնք, սակայն, դեռևս չեն թողարկվել:
Անդրադառնալով իր աշխատանքին Նյուշայի հետ, Լազզարոն նշեց.
«Սկզբում ինձ համար մի փոքր դժվար էր, քանի որ ռուսերենին գրեթե չէի տիրապետում, իսկ նրանք շփվում էին բացառապես ռուսերենով: Բայց հետո, երբ այդ գործում ինձ միացավ նաև իմ տաղանդավոր ընկերը՝ Մարտին Միրզոյանը, կարելի է ասել, որ ամեն ինչ հարթվեց»,- պատմեց Լազզարոն:
Մեր այն հարցին՝ արդյո՞ք աշխատանքի ընթացքում որևէ անհամաձայնություններ եղել են, Լազզարոն նշեց, որ որևէ խնդիր չի եղել, և վերջնական արդյունքը գոհացնող է եղել թե՛ երգչուհու, թե՛ իր և Մարտին Միրզոյանի համար.
«Արդյունքը գոհացնող էր, եթե հակառակը լիներ, ապա Նյուշան հաստատ տեսահոլովակ չէր նկարահանի տվյալ երգի հիման վրա: Երգի գործիքավորման ողջ ընթացքում այն աշխատանքը, որը ես և Մարտինը կատարել ենք, այն, ինչ-որ ներկայացրել ենք, դուր է եկել թե Նյուշային, և թե նրա ստեղծագործական թիմին,- նկատեց Լազզարոն:
Վերջինս ավելացրեց, որ այս պահին համագործակցում է նաև մի քանի այլ ռուս արտիստների հետ, որոնց հետ կատարած աշխատանքի մասին, սակայն, դեռ չի ցանկանում բարձրաձայնել:
Իսկ թե որքանով իր և Նյուշայի համագործակցությունը կնպաստի ռուսական շոու բիզնես մուտք գործելուն, Լազզարոն նկատեց.
«Հաշվի առնելով այն փաստը, որ ռուսական շոու բիզնեսի ամենահայտնի երգչուհիներից մեկը՝ Նյուշան, հետաքրքրություն է ցուցաբերել իմ աշխատանքների նկատմամբ, կարծում եմ՝ այս համագործակցությունը պտուղներ կտա՝ ազդեցություն ունենալով ռուսական էստրադայում իմ՝ նոր աշխատանքներ ստեղծելուն»,- մեզ հետ զրույցում նշեց Լազզարոն:
Հեղինակ՝ Սաթենիկ Խաչատրյան
