Երեկ երեկոյան Գևորգ Մարտիրոսյանն իր երկրպագուներին ներկայացրեց իր նոր՝ «Սրտիս դու անուն» երգի հիման վրա նկարահանած տեսահոլովակը:
Asekose.am-ը կապ հաստատեց երգչի պրոդյուսեր Սամվել Ղազարյանի հետ՝ խոսելու երգի և տեսահոլովակի ստեղծման մանրամասների մասին.
«Երգի երաժտության հեղինակներն են Գևորգ Հովհաննիսյանն ու Գևորգ Սիրեկանյանը, իսկ խոսքերի հեղինակն է Տաթև Սարգսյանը: Տաթևի հետ համագործակցությունը եղել է վերջինիս առաջարկով. նա ասաց, որ երգի համար նախատեսված խոսքեր ունի, ինչն էլ հետագայում արժանացավ իմ և Գևորգի հավանությանն ու սկսվեց երգի ստեղծման պատմությունը: Ի սկզբանե՝ երգը պետք է ունենար բոլորովին այլ գործիքավորում և տեսահոլովակ, բայց դրանք իրականացնելու համար բավականին ժամանակ էր հարկավոր: Պետք է նշեմ նաև, որ մինչև պրեմիերան երգն արդեն տարածվել էր համացանցում դեմո տարբերակով, մենք էլ որոշեցինք մեր տարբերակն ավելի կարճ ժամանակահատվածում պատրաստել և Սևակ Մելքոնյանի (KarenSevak) նվագակցությամբ այն ներկայացնել հանրությանը»,- պատմեց Սամվել Ղազարյանը:
Այն հարցին՝ արդյո՞ք երգն ունի հասցեատեր և արդյո՞ք սա ինչ-որ մեկի սիրո դրսևորումն է, Սամվելը պատասխանեց.
«Այո, երգն ունի հասցեատեր, սակայն չեմ կարող նշել անունը: Չենք ցանկանում բացել փակագծերն ու ասել, թե ում կողմից և ում է նվիրված այն: Երգի հասցեատերը գիտի այդ մասին և դա արդեն բավական է»:
Խոսելով Գևորգի հետագա գործունեության մասին՝ պրոդյուսերը նշեց, որ մինչև Նոր տարի մի քանի ստեղծագործություններ ևս կներկայացնեն հանրությանը.
«Եթե ոչ երկու, ապա մեկ տեսահոլովակ և երկու երգ կներկայացնենք հանդիսատեսի ուշադրությանը, երգերը կլինեն մեկը մյուսից տարբեր ոճերում»,-Asekose.am-ի հետ զրույցում պատմեց պրոդյուսեր Սամվել Ղազարյանը:
Հեղինակ՝ Անահիտ Հարությունյան
