Երեւանի ավագանին իր արտահերթ նիստում բնակարաններ կտրամադրի Մովսես Խորենացու մեդալակիր, Սուրբ Մեսրոպ Մաշտոցի շքանշանակիր, Երևան քաղաքի պատվավոր քաղաքացի, պատվո շքանշանակիր Ռուբեն Մաթևոսյանին: Հայ երգարվեստի միության նախագահին կտրամադրվի ՝ 62.7 քմ մակերեսով բնակարան Սիսակյան փողոցի հ.16 շենքից: Տեղեկանք-հիմնավորման մեջ նշված է, որ տաղանդաշատ երաժիշտը իր կնոջ, որդու ընտանիքի, մյուս որդու եւ դստեր հետ բնակվում են մեկ հարկի տակ` փոքր բնակարանում:
Նույն շենքից բնակարան կստանա նաեւ ՀՀ վաստակավոր արտիստ Ռուդոլֆ Ղևոնդյանը: Դերասանը բնակվում է վարձակալական հիմունքներով:
Հայաստանի Ալ.Սպենդիարյանի անվան օպերայի եւ բալետի ազգային ակադեմիական թատրոնի առաջատար մենապարող, Մովսես Խորենացի մեդալակիր, ՀՀ վաստակավոր արտիստ Սևակ Ավետիսյանը եւս բնակարան կստանա: Սեւակ Ավետիսյանը, ըստ տեղեկանք-հիմնավորման, ապրում եւ ստեղծագործում է Երեւանում, բնակվում է ծնողների, եղբոր ընտանիքի, քրոջ հետ համատեղ եւ հանդիսանում է բնակարանային պայմանների կարիքավոր։
