azatutyun.am-ը գրում է. Զարուհի Փոստանջյանը համաձայն է լինել օմբուդսմեն։ Նրա թեկնածությունն առաջադրելու մտադրություն ունեցող պատգամավոր Էդմոն Մարուքյանը իրենց զրույցից մանրամասներ պատմեց։«Հասկանում և գիտակցում է, որ պետք է նաև վայր դնի իր կուսակցական պատկանելությունը՝ պարզ է՝ ընտրվելու պարագայում»,- ասաց անկախ պատգամավորը։Մարուքյանը կարծում է՝ օմբուդսմենի ընտրություններում իշխանության թեկնածուին այլընտրանք է պետք.- «Ցույց տալու, որ կար նաև այսպիսի թեկնածու, բայց դուք ընտրեցիք իշխանության թեկնածուին, չգիտեմ ով է թեկնածուն, այս պահին չի ասվել»։Խորհրդարանն օմբուդսմենին ընտրում է վեց տարի ժամկետով, պատգամավորների ընդհանուր թվի ձայների առնվազն 3/5-ով։ «Ազատության» հետ զրույցում Փոստանջյանը նկատեց՝ ընդդիմությունը պետք է ներկայանա միասնական թեկնածուով։

«Եթե խոսում ենք իրական ընդդիմադիր դաշտի մասին, ապա այն հնարավորություն ունի առաջադրելու միասնական թեկնածու։ Այս մրցակցության մեջ միգուցե ունենանք հաջողություն։ Ամեն դեպքում պետք է միշտ հիշել, գիտակցել, հասկանալ, որ բոլոր մրցույթներում մենք ունենք այլընտրանք»,- շեշտեց Փոստանջյանը։Հայ ազգային կոնգրեսն ու «Օրինաց երկիրը» օմբուդսմենի թեկնածության հարց չեն քննարկել։ Դաշնակցություն խորհրդարանական խմբակցության ղեկավար Արմեն Ռուստամյանն ասաց՝ դեմ չէ Փոստանջյանի թեկնածությանը.-«Զարուհի Փոստանջյանին իսկապես հարգում եմ՝ որպես ակտիվ և ուրույն, առանձնահատուկ, իր բնավորության գծերն ունեցող պատգամավոր։ Այդ առումով որևէ բան չունեմ ավելացնելու, բայց մնացած հարցերը ընթացքի մեջ թող դրվեն, և մենք, բնականաբար, կորոշենք՝ ում թեկնածությունն ենք պաշտպանելու։ Եթե Փոստանջյանի թեկնածությունը ներկայացվի Պետաիրավական հանձնաժողովից, իհարկե, կպաշտպանենք»։

«Բարգավաճ Հայաստան»-ի ղեկավար Նաիրա Զոհրաբյանը չի բացառում, որ ընդդիմությունը համախմբվի, բայց քիչ հավանական է համարում, որ միասնական թեկնածուն Զարուհի Փոստանջյանը լինի։ «Ես շատ հարգում եմ Զարուհի Փոստանջյանի սկզբունքները, բայց նա խիստ սուբյեկտիվ անձնավորություն է, և ես չեմ կարծում, որ օմբուդսմենի դեպքում այս հստակ սուբյեկտիվիզմը կարող է օգտակար լինել»,- ասաց նա։ 

Մանրամանսերը՝ սկզբնաղբյուր կայքում և տեսանյութում