Մարտունու պաշտպանական ուղղությամբ այսօր՝ ապրիլի 2-ին, ՄՄ-21 կայանքից իրականացված հրթիռահրետակոծության հետևանքով վիրավորված 15-ամյա Գեւորգ Գրիգորյանի և 16-ամյա Վարդան Անդրեասյանի կյանքին վտանգ չի սպառնում: Երեխաները գտնվում են հիվանդանոցի Վերակենդանացման բաժանմունքում, երեխաների վիճակը կայուն ծանր է: Երեխաները Մարտունու շրջանի բնակիչներ են:
Հրթիռահրետակոծության հետևանքով զոհված Վաղինակ Թաթուլի Գրիգորյանը վիրավոր երեխաներից Գևորգ Գրիգորյանի եղբայրն է:
Հիշեցնենք, որ ապրիլի 1-ի լույս 2-ի գիշերը եւ առավոտյան հակառակորդը ղարաբաղա-ադրբեջանական հակամարտ զորքերի շփման գծի ողջ երկայնքով ձեռնարկել է լայնածավալ նախահարձակ գործողություններ, որոնց ընթացքում հրթիռահրետանային արկակոծման են ենթարկվում ոչ միայն հայկական զինուժի պաշտպանական դիրքերը, այլեւ խաղաղ բնակավայրերը: Ըստ ՊԲ օպերատիվ տվյալների, ադրբեջանական զինուժի կողմից ապրիլի 2-ին ժամը 08:30-ի սահմաններում Մարտունու պաշտպանական ուղղությամբ ՄՄ-21 («Գրադ») կայանքից իրականացված հրթիռահրետակոծության հետեւանքով սպանվել է 2004թ. ծնված Վաղինակ Թաթուլի Գրիգորյանը, եւս երկու երեխա վիրավորվել են:
