Այսօր Ոստիկանության հրավիրված ասուլիսին Աշոտ Ահարոնյանն ասաց, որ զինված խմբի հարազատներից մի քանիսը դիմել են իրավապահ մարմիններին՝ աջակցության համար:
«Սասնա ծռեր» խմբավորման անդամ Էդգար Սողոմոնյանի հայրը՝ Մերուժան Սողոմոնյանը, պահանջում է Պավլիկ Մանուկյանից հետ վերադարձնել իր որդուն . «Ինքնա ինձ խնամում, ես ծանր հաշմանդամ եմ, մենակ ինքնա ինձ կարում պահի: Քանի օր ա պետքարան չեմ գնացել, ինձ օգնողն ինքն է»:
Մերուժան Սողոմոնյանը վստահեցնում է, որ իր տղան չէր կարող կապ ունենալ «Սասնա ծռեր» խմբավորման հետ. «Նա ոչ ծառայել ա, ոչ զենք ա բռնել, նրա աչքերը չի տեսնում, երեխուն չնեղեք, ինքը կորել էր, չկար, մեկ էլ իմացա էնտեղա, իմ երեխեն պալիտիկայից հեռու ա, ինքը ոչ մի հարցի չի կարա պատասխանի, ինքը հեռու ա էդ ամեն ինչից: »:
Էդգարի հայրը համոզված է, որ իր տղային խաբեությամբ են տարել ՊՊԾ շենք. «Իրան ասել են Ղարաբաղի հողը տալիս են թուրքին, արի միտինգ գնանք ու միտինգը դարձելա էդ»:
Մերուժան Սողոմոնյանը ասում է, որ Էդգարը ապրում է ՌԴ-ում, հուլիսի 13-ին է եկել, մի քանի օր առաջ պետք է վերադառնար: Նա նաև պատմեց, որ տղայի մայրը երկրաշարժին մահացել է, տատն է խնամել տղային, բանակից ազատվել է՝ վատ տեսողության պատճառով:
«Ես պռոստը իմ երեխային եմ ուզում»,- ասաց Էդգարի հայրը՝ հավելելով, որ իրեն ոչ մեկ չի ստիպել ինչ-որ բան ասել:
Նշենք, որ ավելի ուշ Մերուժան Սողոմոնյանի տղան՝ Էդգարը, հերքել է հոր տարածած տեղեկությունը ասելով, որ ոչ մի ստիպողական բան չի եղել և ինքն իր կամքով է գնացել: