a1plus.am-ը գրում է. «Սասնա ծռեր» խմբավորման անդամ, ոտքերից հրազենային վիրավորում ստացած Պավել Մանուկյանը ցանկություն է հայտնել ներկա լինել իր նկատմամբ խափանման միջոց ընտրելու միջնորդության քննարկմանը:
«Ես չեմ պատկերացնում, իր ծանր վիճակից ելնելով ոնց է գալու, երկու ոտքերից ունի ծանր հրազենային վնասվածքներ, եւ երկաթներով ոտքերը հավաքված են»,- այսօր «Էրեբունի» բժշկական կենտրոնում նրան տեսակցելուց հետո հայտարարեց պաշտպան Ինեսա Պետրոսյանը:
Իսկ ահա Պավել Մանուկյանի որդին՝ 22-ամյա Արամ Մանուկյանը, հրաժարվել է մասնակցել խափանման միջոցի միջնորդության քննարկմանը:
«Նշելով, որ նախ եւ առաջ ինքը ի վիճակի չէ, երկրորդն էլ չի ցանկանում մասնակցել»,- փոխանցեց պաշտպանը:
Արամ Մանուկյանի նկատմամբ խափանման միջոց ընտրելու գործով նիստը տեղի կունենա այսօր: Քննիչն արդեն միջնորդություն է ներկայացրել Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարան:
Իսկ երբ կներկայացվի միջնորդություն Պավել Մանուկյանի մասով դեռ պարզ չէ: Երբ կալանքի որոշումը լինի, նոր միայն անձին քաղաքացիական հիվանդանոցից կարող են տեղափոխել «Դատապարտյալների հիվանդանոց»:
«Կարող են տեղափոխել միայն այն դեպքում, երբ նրանց առողջական վիճակը ներում է եւ կարող են շարունակական բուժումը ապահովվել: Այսինքն՝ «Դատապարտյալների հիվանդանոց»-ն ունի համապատասխան հագեցվածություն, բուժաշխատողներ: «Էրեբունի» բժշկական կենտրոնը եւ «Դատապարտյալների հիվանդանոցը» նույնը չեն կարող լինել»,- նշեց պաշտպանը:
Ի դեպ, Պավել Մանուկյանին տեսակցած պաշտպան Ինեսա Պետրոսյանը նշեց, որ հոգեվիճակը շատ մարտական է: «Նա ասեց, որ իմ ժողովրդին փոխանցեք, որ ես նույն հոգեվիճակում եմ, կպայքարեմ եւ կմեռնեմ ժողովրդիս ոտքերի տակ»,-նշեց Ինեսա Պետրոսյանը:
Ի դեպ, հարազատներին թույլ չեն տալիս տեսակցել նույն հիվանդասենյակում գտնվող Պավել եւ Արամ Մանուկյաններին:
Նյութը՝ սկզբնաղբյուր կայքում
