Ի պատասխան ՀՀ ԱՆ «Նուբարաշեն» քրեակատարողական հիմնարկի կալանավորված անձ Անդրեաս Ղուկասյանի առողջական վիճակի վերաբերյալ վերջինիս կնոջ՝ Անահիտ Թարխանյանի՝ ՄԻՊ աշխատակազմ ներկայացրած դիմումի մեջ հնչած մտահոգությունների՝ Քրեակատարողական ծառայությունը տեղեկացնում է հետևյալը:
Չնայած երեկ՝ օգոստոսի 26-ին, բժշկական աշխատանքային հանձնաժողովը արդեն իսկ զննել էր Անդրեաս Ղուկասյանին և եզրակացրել, որ վերջինիս առողջական վիճակը բավարար է, և բողոքներ չէին հնչել նաև Անդրեաս Ղուկասյանի կողմից, այնուամենայնիվ, հընթացս Անդրեաս Ղուկասյանի կնոջ դիմումի, Մարդու իրավունքների պաշտպանի գրասենյակի միջնորդությամբ այսօր Անդրեաս Ղուկասյանը ենթարկվել է արյան և մեզի լաբորատոր հետազոտության, ինչի արդյունքում պարզվել է, որ «Նուբարաշեն» քրեակատարողական հիմնարկի կալանավորված անձ Անդրեաս Ղուկասյանի արյան և մեզի կլինիկական ցուցանիշները գտնվում են նորմայի սահմաններում:
Առաջիկա աշխատանքային օրերին կկատարվեն այլ անհրաժեշտ հետազոտություններ ևս:
ՀՀ ԱՆ ՔԿՎ հանրային կապերի բաժին
Անահիտ Թարխանյանի դիմումը ՄԻՊ-ին՝ ստորև.
Հարգելի պարոն Թաթոյան,
Արդեն 26 օր է ինչ ամուսինս՝ Անդրիաս Ղուկասյանը Նուբարաշեն քրեակատարողական հիմնարկում գտնվում է հացադուլի մեջ: 2013թ. ՀՀ Նախագահական ընտրությունների ժամանակ, հացադուլի 25-րդ օրը իրականցվել էր Անդրիաս Ղուկասյանի առողջական վիճակի ընդհանուր հետազոտում՝ արյան մանրակրկիտ հետազոտումով եւ ներքին օրգանների սոնոգրաֆիայով:
Ելնելով իրավիճակից, երբ հացադուլի ժամկետը արդեն մոտ է կյանքի համար վտանգավոր սահմանագծին եւ իր պահման վայրի առանձնահատկություններից, խնդրում եմ անհապաղ միջոցներ ձեռնարկել ապահովելու Անդրիաս Ղուկասյանի համար նմանատիպ անկախ բժշկական հետազոտություն:
