Նոյեմբերի 5-ին Արամ Խաչատրյան համերգասրահում տեղի կունենա աննախադեպ համերգ Հայաստանի պետական կամերային նվագախմբի՝ դիրիժոր Վահան Մարտիրոսյանի, Ռուբեն Հախվերդյանի և ՀՀ վաստակավոր արտիստ Հակոբ Ջաղացպանյանի մասնակցությամբ: Կատարվելու են Ռուբեն Հախվերդյանի ստեղծագործությունները, որոնք կամերային նվագախմբի և տարբեր անսամբլների համար գործիքավորել ու մշակել է կոմպոզիտոր, ՀՀ կոմպոզիտորների միության անդամ Նարինե Զարիֆյանը։ Խորագիրն է՝ «Կտրուկ շրջադարձ»:
«Բոլոր ստեղծագործությունները հնչելու են նորովի»,-լրագրողների հետ հանդիպման ժամանակ ասաց Նարինե Զարիֆյանը։
Իսկ, թե ինչո՞ւ «Կտրուկ շրջադարձ»,-Ռուբեն Հախվերդյանը պատասխանեց.
«Ճշմարտությունը կլոր է, բայց ասեմ, օրինակ՝ կտրուկ շրջադարձ էր կառավարության փոփոխությունը, այս նվագախմբի հետ աշխատելը»:
Վահան Մարտիրոսյանն էլ հավելեց. «Ռուբեն Հախվերդյանը իմ սիրած, պոետիկ անձանցից մեկն է և ուրախ եմ նրա հետ մեկ բեմում գտնվել: Եթե մի 20 տարի առաջ նման բան ասեին՝ կծիծաղեի ու կասեի, որ անհնարին է: Հիմա տեսնում ենք, որ կտրուկ շրջադարձ է»:
Հանդիպման ժամանակ հարց հնչեց Առաջին տպարանի պայթեցման, Էջմիածնի փողոցներից մեկն Արամ Ասատրյանի անունով անվանակոչելու մասին.
Անդրադառնալով Առաջին տպարանի պայթեցմանը՝ Ռուբեն Հախվերդյանն ասաց.
«Կարծեմ, այսօր այդ առիթով չենք հավաքվել: Ճիշտն ասած ես Երևանում չեմ ապրում, Պռոշյանում եմ ու առաջին անգամ եմ լսում: Ի՞նչ ասացիք, ի՞նչ շենք...ոչինչ ասել չեմ կարող, քանի որ չգիտեմ, թե խոսքն ինչի մասին է»:
Երկրորդ հարցի մասով էլ նկատեց.«Դա մեր ժողովրդի տգիտության արդյունքն է: Իհարկե, մեծ մասի»:
Անի Կարապետյան