Կոլումբիայում ավիավթարից ողջ մնացած բրազիլական «Շապեկոենսե» ֆուտբոլային ակումբի դարպասապահ Մարկոս Դանիլոն մահացել է հիվանդանոցում: Այս մասին հաղորդում է Globo Esporte-ն:
Ինքնաթիռի կործանումից հետո Դանիլոյին, որը լուրջ վնասվածքներ էր ստացել, տեղափոխել էին հիվանդանոց: Բժիշկներին, սակայն չի հաջողվել փրկել 31-ամյա ֆուտբոլիստի կյանքը:
Դանիլոն «Շապեկոենսեի» այն երեք ֆուտբոլիստից մեկն էր, որ ողջ էր մնացել. փրկվածների թվում են Ալան Ռուշելն ու Ջեքսոն Ֆոլմանը:
Հիշեցնենք, որ «Շապեկոենսեն» Բրազիլիայից մեկնում էր Կոլումբիայի Մեդեյին քաղաք` նոյեմբերի 30-ին Հարավային Ամերիկյան գավաթի եզրափակչի շրջանակներում «Ատլետիկո Նասյոնալի» դեմ մրցելու:Կործանված օդանավում գտնվել է 72 ուղևոր և անձնակազմի 9 անդամ, «Շապեկոենսե» թիմի ֆուտբոլիստներ և հավատարմագրված լրագրողներ:
Հավելենք, որ կոլումբիական «Ատլետիկո Նասիոնալը» դիմել է Հարավամերիկյան կոնֆեդերացիային, որպեսզի Կոպա Սուդամերիկայի հաղթող ճանաչեն «Շապեկոենսեին»: