Armtimes.com-ին հայտնի դարձավ, թե ովքեր են ՀՀ-ում Եվրոպական միության պատվիրակության կողմից հատկացված դրամաշնորհի գումարներից առանձնապես խոշոր չափերի հափշտակության գործով հետախուզման մեջ գտնվող անձանցից երկուսը:
Գեղամ Պետրոսյանը (ձախ լուսանկարում) մի քանի տարի գլխավորել է Հայաստանի «Փոքր եւ միջին բիզնեսի զարգացման աջակցման կենտրոնը» (ՓՄՁ ԶԱԿ):
2016 թվականի մարտին, երբ ՀՀ Պետեկամուտների կոմիտեի նախագահ նշանակվեց Հովհաննես Հովսեփյանը, Գեղամ Պետրոսյանը դարձավ ՊԵԿ աշխատակազմի ղեկավար եւ հրաժարական տվեց այդ պաշտոնից, երբ իր պաշտոնը ազատեց նաեւ Հովհաննես Հովսեփյանը:
Հետախուզման մեջ գտնվող անձանց շարքում է նաեւ Հրայր Գյոնջյանը (աջ նկարում): Նա երկար ժամանակ աշխատել է կառավարությունում վարչապետ Անդրանիկ Մարգարյանի օրոք: Այնուհետեւ հիմնել է Մաքսային բրոկերների ասոցիացիան: Հետագայում նա հիմնել է ընկերություն Մեծ Բրիտանիայում եւ, մեր տեղեկություններով, ներգրավված է եղել «Դուինգ բիզնես»-ի հետազոտություններում որպես փորձագետ:
Նյութը՝ սկզբնաղբյուր կայքում
Հիշեցնենք, որ ձեռք բերված փաստական տվյալների հիման վրա՝ մի խումբ անձանց կողմից նախնական համաձայնությամբ, խարդախությամբ ՀՀ-ում Եվրոպական միության պատվիրակության կողմից հատկացված դրամաշնորհների առանձնապես խոշոր չափերի գումարի հափշտակություն կատարելու կասկածանքով 2017 թվականի ապրիլի 26-ին ձերբակալվել է ՀՀ-ում Եվրոպական միության պատվիրակության դրամաշնորհային ծրագրերի համակարգող Մարինե Պապյանը:
