Փոփոխություններ են սպասվում մարդու իրավունքների, արդարադատության ոլորտներում, ինչպես նաև կոռուպցիայի դեմ պայքարում:
«Փորձելու են նվազագույնի հասցնել ԴԱՀԿ-ի կողմից հայեցողական գործողություններ կատարելու շրջանակը: Նախագծով հստակ սահմանափակում է դրված: Եթե կոնկրետ գործողության կատարման կամ որոշման կայացման առիթը ծագել է, ապա հարկադիր կատարողն ընդամենը 3 օր ունի որոշումն ընդունելու և գործողությունը կատարելու համար: Հստակ ժամկետ է սահմանվել նաև հարկադիր աճուրդների կազմակերպման հարցում: Գործող օրենքով հստակ ժամկետ չկար, թե հարկադիր կատարողը երբ կարող է աճուրդ կազմակերպել, սա սահմանափակել ենք: Հարկադիր կատարողը սա այլևս չի կարող ձգձգել»,-լրագրողների հետ հանդիպման ժամանակ ասաց ՀՀ արդարադատության նախարարի տեղակալ Արթուր Հովհաննիսյանը:
Նրա փոխանցմամբ՝ փոփոխություն է սպասվում նաև անվճար իրավաբանական օգնության ոլորտում.
Հանրային պաշտպանի գրասենյակն անվճար օգնություն կազմակերպում է ոչ միայն իր գրասենյակի աշխատողների միջոցով, այլև Փաստաբանական դպրոցի ունկնդիրների, իրավաբանների միջոցով, որոնք անվճար խորհրդատվություն տալու ցանկություն են հայտնել:
Դատական համակարգում ևս փոփոխություններ կարվեն.
«Նախագիծը ներկայացվել է ԱԺ քննարկման: Նախ վերանայվելու է գործող դատավորների քանակը, ինչպես նաև մինչ դատական վարույթին վերաբերող վերահսկողական գործառույթները՝ կալանավորում, խափանման միջոց և այլն, դատարաններում կիրականացվեն բացառապես քրեական մասանգիտացում ունեցող դատավորների կողմից: Բացի այդ՝ նախատեսվում է Վճռաբեկ դատարանի նոր պալատի ստեղծում , որը կքննի վարչական գործերը»,-տեղեկացրեց Արթուր Հովհաննիսյանը:
Նրա հաղորդմամբ՝ կսկսվի նաև դատական արխիվների էլեկտրոնացման գործընթացը:
ՀՀ արդարադատության նախարարի տեղակալ Սուրեն Քրմոյանի հաղորդմամբ էլ՝ հունիսի սկզբից կունենանք պայմանական վաղաժամկետ ազատման նոր համակարգ.
«Անկախ հանձնաժողովի քննելուց հետո որոշումը կկայացնի դատարանը»,-նշեց Սուրեն Քրմոյանը:
Անի Կարապետյան
