Թուրքական «Անադոլու» և «Իհլաս» գործակալությունների թղթակից, ազգությամբ ադրբեջանցի լրագրող ու վերլուծաբան Ֆուադ Աբբասովը ռուսական «Զվեզդա» («Звезда») հեռուստաալիքի եթերում իսրայելա-պաղեստինյան հակամարտության նոր սրացման շուրջ քննարկման ժամանակ հարձակվել է հայ փորձագետ Սարգիս Ծատուրյանի վրա՝ փորձելով ծեծել նրան:
Համացանցում տարածված տեսանյութում երևում է, թե ինչպես է Աբբասովը նախ բղավում Ծատուրյանի վրա, այնուհետև վեր կենում ու արագ քայլում նրա ուղղությամբ՝ փորձելով հարվածել: Ծատուրյանը դիմադրություն է ցույց տալիս ադրբեջանցի լրագրողին, նույն պահին կոնֆլիկտին միջամտում է մեկ այլ ռուսաստանաբնակ հայազգի փորձագետ Գևորգ Միրզայանն ու փորձում բաժանել վիճող կողմերին:
