Պետական, հասարակական գործիչ, Հայոց նորագույն պետականության հիմնադիր, Առաջին Հանրապետության ներքին գործերի նախարար Արամ Մանուկյանի արձանի էսքիզը շատերին դուր չի եկել, այդ թվում՝ ճարտարապետ Հրաչյա Պողոսյանին:

«Արձանը թեք դրել են աստիճանների վրա: Լսում էի՝ քանդակագործը բացատրում էր, որ ճեղք է արված, հրաբխի նման դուրս է գալիս պետականությունը՝ դրոշի տեսքով, Արամ Մանուկյանն էլ հետը: Բայց ես կարծում եմ՝ աբստրակտ մտածողությունը նկարչության, քանդակագործության մեջ ոչ միշտ է արդարացված: Չեմ կարծում, որ լուրջ նախագիծ է, սա այն դեպքը չէ, որ պետք է նրան փաթաթեն դրոշի մեջ»,-լրագրողների հետ հանդիպման ժամանակ նման տեսակետ հայտնեց ճարտարապետը:

Նշենք, որ Հրաչյա Պողոսյանի նախագծերով կառուցվել են Երևանում՝ «Ռոսիա» կինոթատրոնը (1970-1974, համահեղինակներ՝ Թարխանյան, Խաչիկյան, կոնստրուկտորներ՝ Գևորգյան, Ծատուրյան, ԽՍՀՄ Մինիստրների խորհրդի մրցանակ, 1979), Երիտասարդության պալատը (1979, համահեղինակներ՝ Թարխանյան, Խաչիկյան, կոնստրուկտորներ՝ Գևորգյան, Ծատուրյան, Բաղդասարյան, ՀամԼԿԵՄ մրցանակ, 1981), Մարզահամերգային համալիրը (սկսվել է 1978 թվականին, հեղինակային խմբի հետ), Դիլիջանում՝ ԽՍՀՄ կինեմատոգրաֆիստների ստեղծագործական տունը (սկսվել է 1974 թվականին, համահեղինակներ՝ Խաչիկյան, Սաֆարյան), Գորիսում բնակելի թաղամաս (1975, համահեղինակներ՝ Մկրտչյան, Սողոյան) և այլն:

Անի Կարապետյան

Լուսանկարը՝ Երկիր Մեդիայի