Երևանի քաղաքապետի օգնական, տուրիզմի ոլորտը համակարգող Մարիա Բարաղամյանը, քաղաքապետարանի աշխատակազմի մշակույթի վարչության պետ Ռուբեն Հովհաննիսյանը և տուրիզմի բաժնի պետ Գևորգ Օրբելյանը Երևանի քաղաքապետարանում հյուրընկալել են «Երևան ՏԱՐԱԶֆեստ» 4-րդ փառատոնին մասնակցելու նպատակով Իսպանիայից ժամանած Վիյենայի քաղաքապետարանի տուրիզմի բաժնի ղեկավար Մերսեդես Մենոր Սեզպեդեսին:
Քաղաքապետի օգնական Մարիա Բարաղամյանը, ողջունելով Վիյենայի քաղաքապետարանի մասնակցությունը փառատոնին, նշել է, որ «Երևան ՏԱՐԱԶֆեստը» Երևանի քաղաքապետարանի տուրիզմի բաժնի կողմից իրականցվող զբոսաշրջային բաղադրիչ պարունակող երեք հիմնական փառատոներից մեկն է, և հենց այդ պատճառով շատ կարևոր է, որպեսզի փառատոնին իրենց մասնակցությունն ունենան նաև աշխարհի այլ քաղաքների ներկայացուցիչներ, հատկապես այս տարի, երբ տարին հոբելյանական է Երևանի համար:
Վիյենայի քաղաքապետարանի տուրիզմի բաժնի ղեկավար տիկին Մերսեդես Մենոր Սեզպեդեսն էլ իր հերթին շնորհակալություն է հայտնել ջերմ ընդունելության համար և նշել, որ հետևել է նախորդ տարիներին կազմակերպված փառատոներին և ուրախ է, որ այս տարի կմասնակցեն օգոստոսի 4-ին կայանալիք փառատոնին և կներկայացնեն նաև իրենց իսպանական ազգային հագուստներն ու մշակույթը:
Հանդիպման շրջանակում կողմերը քննարկել են նաև երկու քաղաքների միջև տուրիզմի ոլորտում գործընկերական կապերն ամրապնդելու և համագործակցության նոր եզրեր գտնելու վերաբերյալ հարցեր:
Երևանի քաղաքապետարանի տեղեկատվության
և հասարակայնության հետ կապերի վարչություն
«Երևան ՏԱՐԱԶֆեստ» 4-րդ փառատոնի մասին մամուլի ասուլիսն ամբողջությամբ՝ տեսանյութում:
