Արդեն տեղեկացրել ենք, որ Փինք Արմենիա կազմակերպությունը երեկ տարածել էր հաղորդագրություն, ըստ որի Սյունիքի մարզի Շուռնուխ գյուղում ավելի քան 30 հոգով հարձակվել են 9 ԼԳԲՏ ակտիվիստների վրա, ծեծել նրանց:
«Հարձակվողներից գլխավորը' Հարութը , (եթե ճիշտ է ասել անունը) ցինիկ ձևով՝ ոստիկանության դիմաց , կողքինը գյուղապետն էր»,-գրել է Էլվիրա Մելիքսեթյանը ֆեյսբուքյան իր էջում։
Ոստիկանությունը պարզաբանում է ներկայացրել Շուռնուխ գյուղում տեղի ունեցած վիճաբանության առնչությամբ, որում, մասնավորապես, նշվում է.
«Զանգվածային լրատվության միջոցներում տեղեկատվություն է տարածվել, թե օգոստոսի 3-ին, ժամը 20.00-ի սահմաններում Սյունիքի մարզի Շուռնուխ գյուղում ավելի քան 30 մարդ հարձակվել են ԼԳԲՏ 9 ակտիվիստի վրա և ծեծել:
Հայտնում ենք, որ օգոստոսի 3-ին, ժամը 20.30-ի սահմաններում, ոստիկանության Երևան քաղաքի վարչության օպերատիվ կառավարման կենտրոնից Գորիսի բաժին հաղորդում է ստացվել, որ իրենց է զանգահարել Հայկ Հ.-ն և հայտնել, որ երկու տղամարդ եկել և ցանկանում են պարզաբանումներ կատարել իրենց հետ, խնդրում է ոստիկան մոտենա:
Մեկնած օպերատիվ խումբը պարզել է, որ օգոստոսի 3-ին, ժամը 20.00-ի սահմաններում, Շուռնուխ գյուղի մի խումբ բնակիչներ 1997 թ. ծնված Հայկ Հ.-ից և նրա ընկերներից պահանջել են հեռանալ գյուղից՝ պատճառաբանելով, որ վերջիններս համասեռամոլներ են, այնուհետև նրանց միջև առաջացել է վիճաբանություն, որի ընթացքում գյուղացիներից ոմանք ծեծի են ենթարկել Հայկ Հ.-ին ու նրա ընկերներին:
Չորս անձինք մարմնական վնասվածքներով տեղափոխվել են հիվանդանոց` բուժօգնության, այնուհետև ոստիկանության ծառայողները, ապահովելով նրանց անվտանգությունը, ուղեկցել են դեպի Երևան:
Կան բերման ենթարկվածներ:
Դեպքի բոլոր հանգամանքները պարզվում են:
Նշանակվել է ԴԲՓ:
Նախապատրաստվում են նյութեր»:
