«Հայ ժողովրդի հետ որևէ մեկը չի կարող սպառնալիքների լեզվով խոսել, որևէ մեկը չի կարող սպառնալ Քննչական ծառայության ներկայացուցիչներին կամ իրավապահ մարմիններին։ Նրանք ՀՀ զինանշանը կրող մարդիկ են, ՀՀ-ն են ներկայացնում, և այդ սպառնալիքները որևէ լավ տեղ չեն բերի»։ Այս մասին այսօր ԱԺ-ում լրագրողների հետ զրույցում ասաց «Ելք» խմբակցության պատգամավոր Ալեն Սիմոնյանը:
Նա կարծիք հայտնեց, որ Քոչարյանի հարցազրույցն «աբսուրդ և ավելի շատ սպառնալիք» էր, իսկ սպառնալիքի լեզվով հայ ժողովրդի հետ խոսողներն, ըստ Սիմոնյանի՝ իրենց պատասխանը վերջերս ստացել են.
Ալեն Սիմոնյանն անդրադարձավ նաև Քոչարյանի մտքին, ըստ որի՝ իրենից պետք է ներողություն խնդրեն, այլապես ինքն այլ քայլերի է դիմելու, ասելով.
«Ի՞նչ քայլերի է դիմելու։ Նախ՝ 10 տարվա համար ո՞վ պետք է ներողություն խնդրի, իսկ հետո 2008 թ. մարտի 1-ի համար ո՞վ պետք է ներողություն խնդրի, ծնողներից ո՞վ պետք է ներողություն խնդրի, մեր պատուհանների վրա կրակելու համար ո՞վ պետք է ներողություն խնդրի…»:
Թե ինչո՞ւ ԱԱԾ և ՀՔԾ ղեկավարների խոսակցության գաղտնալսումը հիմա հրապարակվեց, պատգամավորն ասաց, որ որ դա վաղուց էր պլանավորված, ինչ-որ ակցիա է, և չբացառեց, որ այլ ձայնագրություններ ևս կհայտնվեն։
Հարցին՝ ո՞ւմ կողմից է պլանավորված, Ա.Սիմոնյանը պատասխանեց. «Իմ կարծիքն է, որ արվել է երկրորդ նախագահի փաստաբանների կողմից, ոչ թե նրան դատարանում ներկայացնող փաստաբանների, այլ մարդկանց, ովքեր ներկայում զբաղված են Ռոբերտ Քոչարյանի փաստաբանությամբ՝ որպես քաղաքական գործիչ»։
