«ՀՀ քաղաքացիներն են կայացրել որոշում, թե ով պետք է լինի Երևանի քաղաքապետ: Իհարկե կա պնդում, որ որոշում կայացնելու պահին քաղաքացիների տրամադրությունը շատ բարձր է եղել, բայց դա կապ չունի: Այո, մի անգամ բարձր կլինի, մյուս անգամ՝ ոչ այնքան, հետո՝ սովորական...
Առանցքային իմաստն այն է, որ որոշման կայացման ազատությունը երբեք կասկածի տակ այլևս չպետք է դրվի»,- այս մասին այսօր Երևանի քաղաքապետի երդմնակալության արարողության ժամանակ իր ելույթում ասաց ՀՀ վարչապետը:
Փաշինյանն անդրադարձավ նաև նոր Երևանի կերպարին ու այս համատեքստում ներկայացրեց ՀՀ ժողովրդական արտիստ Տիգրան Մանսուրյանի օրինակը. «Վերջերս շատ հաճախ հիշում եմ Մանսուրյանին ու հիշում իր մասին գրված մի հոդված: Ինչ-որ մի երկրում հերթական մրցանակն է ստանում, որը ներառում է դրամական պարգև: Մանսուրյանը, վերադառնալով Հայաստան, գնում է հարկային ու ասում, որ եկամուտ է ստացել, որի մասին տեղյակ չեն: Հուսով եմ՝ սա ՀՀ նոր քաղաքացու կերպարը կլինի, որը ոչ թե պետք է մտածի՝ ինչ անի հարկ չվճարելու համար, այլ հակառակը»:
Հավելենք, որ Երևանի նորընտիր քաղաքապետ Հայկ Մարությանի պաշտոնը ստանձնելու երդման հանդիսավոր արարողությանը ներկա են գտնվել նաև Հանրապետության նախագահ Արմեն Սարգսյանն ու Ն.Ս.Օ.Տ.Տ. Գարեգին Բ Ծայրագույն Պատրիարք Ամենայն Հայոց կաթողիկոսը:
