Վարչապետի պաշտոնակատար Նիկոլ Փաշինյանը նոյեմբերի 13-ին խորհրդարանում հայտարարել է, որ իրենք նաև լրջագույն սոցիալական ծրագրեր են իրականացնում հենց 2019 թ. բյուջեով.
«Մենք բյուջետային որոշումների արդյունքում կհասնենք մի իրավիճակի, երբ ՀՀ-ում 85 հազար նպաստառու և թոշակառու, ում ստացած նպաստը և թոշակը գտնվում են պարենային գծից ներքև, 2019 թ.-ից կստանան այնպիսի թոշակ, որ մենք համոզված լինենք` նրանք առնվազն իրենց հաց, սնունդը գնելու հնարավորություն կունենան»,- նշել է նա:
Վարչապետի պաշտոնակատարն ասել է, որ կուտակային կենսաթոշակային համակարգի փոփոխության արդյունքում իրենք արդեն իսկ բարձրացրել են 6000 քաղաքացու աշխատավարձերը`այդ ընթացքում տարեկան 14 մլրդ դրամ թողնելով շրջանառության մեջ: Նա հայտնել է, որ եկամտահարկի փոփոխության արդյունքում ավելանալու է 210 հազար մարդու աշխատավարձ, միկրոբիզնեսի հետ կապված որոշումների արդյունքում էլ, ըստ էության, ավելանալու են մոտ 70 հազար քաղաքացիների եկամուտները:
Նիկոլ Փաշինյանը նաև հիշեցրել է, որ որոշում է կայացվել, և 2019 թ. կբարձրանան պոլիկլինիկաների 14 հազար աշխատողների աշխատավարձերը:
