ՀՀ երկրորդ նախագահ Ռոբերտ Քոչարյանի կալանքի հարցով այսօր՝ նոյեմբերի 15-ին Վճռաբեկ դատարանը դռնփակ նիստ էր անցկացնում:
Նիստին ներկա էր նաև Ռոբերտ Քոչարյանը:
Քոչարյանի պաշտպանները պահանջում էին Վճռաբեկ դատարանում քննարկման առարկա դարձնել նախկին նախագահի կալանավորման դեմ բերած փաստարկներից ևս երկուսը, մինչդեռ մեղադրող կողմը վիճարկում է կալանքը որպես խափանման միջոց վերացնելու՝ Վերաքննիչ դատարանի որոշումը: Ռոբերտ Քոչարյանի խափանման միջոցի վերաբերյալ դատախազության բողոքը բավարարվեց մասնակի, պաշտպանների բողոքը մերժվեց:
«ՀՀ վերաքննիչ քրեական դատարանի 2018 օգոստոսի 13-ի որոշումը բեկանել և գործ ուղղարկել նոր քննության: Որոշումը ենթակա չէ բողոքարկման և ուժի մեջ է մտնում հրապարակման պահից»,- նշել է դատավոև Լիլիթ Թադևոսյանը: Այսպիսով՝ Ռոբերտ Քոչարյանի գործը կրկին վերաքննիչ դատարան է ուղարկվել:
Հայաստանի նախկին նախագահը «Մարտի 1»-ի գործով մեղադրվում է մի խումբ անձանց հետ սահմանադրական կարգը տապալելու մեջ: Հուլիսի 27-ին Երևանի ընդհանուր իրավասության դատարանը նրա նկատմամբ խափանման միջոց էր ընտրել երկամսյա կալանավորումը: Օգոստոսի 13-ին, սակայն, Վերաքննիչ դատարանը վերացրեց առաջին ատյանի այդ որոշումը՝ Սահմանադրությամբ նախագահին տրված անձեռնմխելիության հիմքով:
Պաշտոնաթող նախագահն առաջադրված մեղադրանքները չի ընդունում:
