Այսօր Կառավարության նիստից հետո լրագրողների հետ զրույցում ՀՀ ոստիկանապետ Վ. Օսիպյանը, անդրադառնալով համաներումից հետո հանցագործությունների թվի աճին, նշել է.
«Հանցագործությունների աճ գոյություն ունի, բայց ռիսկային ու մտահոգող չէ և առայժմ կապ չունի համաներման հետ. դա պայմանավորված է մի քանի գործոններով: Ոստիկանության համակարգում իսպառ վերացել է հանցագործությունը թաքցնելու արատավոր երևույթը, քաղաքացիների վստահությունը դեպի ոստիկանությունն ավելացել է»,- ասել է Օսիպյանը:
Իսկ հարցին՝ արդյո՞ք հանցագործությունները թաքցվո՞ւմ էին Վլադիմիր Գասպարյանի պահանջով, Օսիպյանը պատասխանել է.
«Վլադիմիր Գասպարյանը միշտ, նշանակման առաջին օրվանից պահանջել է, որ չթաքցվեն, թաքցնելը տեսեք ոնց է եղել՝ քաղաքացին գալիս էր հաղորդում տալու բնակարանային գողության մասին, ոստիկանները որպեսզի դա չազդի ցուցանիշների վրա, համոզում էին քաղաքացուն, որ լավ կլինի դուք գնաք, մենք բանավոր կգրանցենք, հենց գողին բռնենք ձեզ կտեղեկացնենք»,- նշել է ՀՀ ոստիկանապետը: