Ավարտվել է «Իմ քայլը» խմբակցության առաջին նիստը: Նիստից հետո Ալեն Սիմոնյանը լրագրողների հետ զրույցում հայտնել է, որ նիստին ներկա են եղել հիմնականում այն մարդիկ, որոնք Ազգային Ժողովում ներկայացնելու են «Իմ քայլը» դաշինքը:
«Այլ թեկնածուների քննարկում եղել է վարչության կազմում, որը «Քաղաքացիական պայմանագիր» կուսակցության ղեկավար մարմինն է եւ որը ձեւավորել է նաեւ Ազգային ժողովի մեր ցուցակը: Այդ քննարկումների ավարտին կոնսենսուսով բերվել է այն թեկնածուների ցուցակը, որը ներկայացվեց ներսում»,-ասաց Ա. Սիմոնյանն ու նշեց, որ որոշումները կայացվել են միաձայն, քննարկումների արդյունքում, եղել է մեկ ձեռնպահ:
Դիտարկմանը, թե ԱԺ-ում խմբակցությունը ներկայացնելու Լիլիթ Մակունցի թեկնածությունը միանշանակ չի ընդունվել, Ալեն Սիմոնյանը պատասխանեց.
«Դա չի համապատասխանում իրականությանը, տարբեր թեկնածուներ են քննարկվել, եկել ենք այն եզրահանգման, որ Լիլիթ Մակունցի թեկնածությունն ամենաճիշտն է»:
Խմբակցության քարտուղար կնշանակվի Հակոբ Սիմիդյանը
Ալեն Սիմոնյանը վստահեցրեց, որ որոշումները միանձնյա չեն ընդունվում, եղել են երկար քննարկումներ:
Նա հայտնեց նաեւ, որ որպես ԱԺ խոսնակ առաջարկվել է Արարատ Միրզոյանի թեկնածությունը, որպես փոխխոսնակներ՝ իր եւ Լենա Նազարյանի թեկնածությունը:
Քննարկվել են նաեւ հանձնաժողովների նախագահների անունները, այս պահին կա 10 հանձնաժողով, կառաջարկվի այդքան, թեպետ սահմանադրությունը թույլ է տալիս ունենալ 12 հանձնաժողով:
