Ն.Ս.Օ.Տ.Տ. Գարեգին Երկրորդ Ամենայն Հայոց կաթողիկոսը ճրագալույցի Սուրբ Պատարագին հետևել է էջմիածնի Սուրբ Գայանե եկեղեցում։
Նշենք, որ այսօր բոլոր եկեղեցիներում մատուցվել է ճրագալույցի Սուրբ Պատարագ. այն տարին 2 անգամ է մատուցվում` Ս. Ծննդյան և Ս. Հարության տոներին:
Ճրագալույց նշանակում է ճրագ (մոմ) լուցանել, այսինքն` վառել: Այդ օրը երեկոյան մարդիկ եկեղեցում վառված ճրագներն իրենց հետ տուն են տանում: Ճրագը խորհրդանշում է աստվածային լույս, եկեղեցու օրհնություն: Ճրագալույցը խորհրդանշում է բեթղեհեմյան աստղի լույսը, որն առաջնորդեց մոգերին դեպի Հիսուս Մանուկ:
Պահեցողները պահքի շրջանից դուրս են գալիս հունվարի 5-ի երեկոյան, երբ եկեղեցում մատուցվում է Ս. Ծննդյան Ճրագալույցի Ս. Պատարագ և տրվում է Ս. Ծննդյան ավետիսը, կամ պահքից դուրս են գալիս հունվարի 6-ին՝ Ս. Ծննդյան Ս. Պատարագից հետո:
Մարդիկ միմյանց ողջունել են այսպես. «Քրիստոս Ծնվեց և Հայտնվեց, Օրհնյալ է Հայտնությունը Քրիստոսի»:
Ստորև ներկայացվող տեսանյութում էլ կարող եք դիտել Տավուշի թեմի հոգեւոր առաջնորդ Բագրատ եպիսկոպոս Գալստանյանի քարոզը Ճրագալույցի Սուրբ Պատարագին՝ Հաղարծնի վանքում:
