ՀՀ ԱԺ «Իմ քայլը» խմբակցության նախագահ, Մշակույթի նախկին նախարար Լիլիթ Մակունցի ֆեյսբուքյան էջից տեղեկանում ենք, որ ինքը խոստանում է զրպարտության համար դատի տալ դերասան, ՀՀ վաստակավոր արտիստ Վիգեն Ստեփանյանին, եթե վերջինս հրապարակավ ներողություն չխնդրի իրենից։
Լիլիթ Մակունցը տեսանյութ է հրապարակել, որում Վիգեն Ստեփանյանն ասում է, որ իրեն հասած տեղեկությամբ Լիլիթ Մակունցը նախարար եղած ժամանակ ԱՄՆ հանդիպել է հայ արվեստագետների հետ։
Ըստ Վիգեն Ստեփանյանի՝ 50 անց մի կին հարցրել է, թե ինչու են անտեսվում տարիքն առած արվեստագետները, ինչին Մակունցն ասել է` ավագ սերունդը կոռումպացված է։
«Հիմա ինձ հետաքրքրում է` ես ներկայացումից առաջ ասել եմ` ժողովուրդ ջան, մարդա 200 դրամ հավաքեք լավ խաղամ, չեմ հասկանում` մենք ո՞նց ենք կոռումպացվել»,–ասել է Ստեփանյանը՝ հիշեցնելով, որ այդ նույն ավագ սերունդը փողոցներում էր, հրապարակում էր և սատարում հեղափոխությանը։
Լիլիթ Մակունցը ֆեյսբուքյան իր էջում տեսանյութին կից գրել է հետևյալը. «Այս տեսանյութում (22-րդ րոպեից) հարգարժան դերասան Վիգեն Ստեփանյանն ինձ վերագրում է խոսքեր, որոնք իբրև ասել եմ Միացյալ Նահանգներում հայ արվեստագետների հետ հանդիպման ժամանակ:
Դիմում եմ պարոն Ստեփանյանին հետևյալ կոչով. կամ ապացուցում եք, որ ես նման բան եմ ասել, կամ հրապարակավ ներողություն խնդրում ինձանից: Հակառակ պարագայում զրպարտության համար համապատասխան ընթացակարգով դիմելու եմ իրավապահ մարմիններին:
Ի դեպ, այդ հանդիպումը տեսագրվել է:»,–գրել է Մակունցը: