Ռուսաստանաբնակ խոշոր գործարար, «Տաշիր» ընկերության սեփականատեր Սամվել Կարապետյանի եղբորորդին՝ Նարեկ Կարապետյանը, չի ընդունում իրեն առաջադրված մեղադրանքը:
Երեկ նախաքննական մարմինը նրան եւ ընկերոջը՝ Տիգրան Ասլանյանին, մեղադրանք է առաջադրել գործարար Վահե Պարազյանից առանձնապես խոշոր չափերով շորթում կատարելու համար:
armtimes.com-ն է գրում և նշում, որ ըստ նախաքննական մարմնի՝ օբյեկտիվ քննությամբ պարզվել է, որ 28-ամյա երիտասարդը, շորթմամբ առանձնապես խոշոր չափերի գումար հափշտակելու շուրջ նախնական համաձայնության գալով ընկերոջ հետ, վախեցնելու, կամքը ճնշելու նպատակով, 2019թ. հուլիսի 3-ին՝ ժամը 19:30-ի սահմաններում, Երեւան քաղաքի Ալեք Մանուկյան փողոցում բռնություն է գործադրել 30-ամյա տղամարդու (Վահե Պարազյանի,-հեղ.) նկատմամբ, որից հետո նույն օրը՝ ժամը 22:30-ի սահմաններում:
Երեւանի սրճարաններից մեկում կրկին հանդիպել է նրա հետ եւ պահանջել վճարել առանձնապես խոշոր չափի գումար:
Մերժում ստանալով՝ 28-ամյա երիտասարդը (Նարեկ Կարապետյանը) զանգահարել է տուժողին եւ հանդիպման կանչել Երեւան քաղաքի ռեստորաններից մեկում: Հանդիպման ժամանակ, որին ներկա են եղել նաեւ այլ անձինք, երիտասարդը, տուժողի եւ նրա ընտանիքի անդամների նկատմամբ բռնություն գործադրելու սպառնալիքով, շարունակել է պահանջել առանձնապես խոշոր չափի գումարը՝ մի խումբ անձանց հետ դարձյալ բռնություն գործադրելով 30-ամյա տղամարդու եւ վերջինիս հետ հանդիպման գնացած նրա ընկերոջ նկատմամբ:
Պաշտպանական կողմը գտնում է, որ վերոնշյալ մեղադրանքը բացահայտ ապօրինի է եւ իրականության հետ որեւէ առնչություն չունի: Մեր զրույցում Կարեպտյանի պաշտպան Արմեն Ֆերոսյանը նշեց, որ մեղադրանքի առաջադրման համար բացառապես հիմք է հանդիսացել Վահե Պարազյանի ցուցմունքը: «Սա, մենք կարծում ենք, որ դատական պրակտիկայում եզակի հանդիպող դեպք է, մենք գտնում ենք, որ պետք է մանրակրկիտ քննություն կատարվեր, նոր որոշեին անձին մեղադրանք առաջադրում են, թե ոչ: Եթե այդպես լինի, այսօր ցանկացած անձի ում երբ ուզեն՝ կարող են մեղադրանք առաջադրել, ինչ ա թե մի հոգի իր դեմ ինչ-որ զրպարտանք է գրել»,- ասաց պաշտպանը: Վերջինս նշեց, որ քննիչի մեղադրանքի որոշման դեմ բողոքներ են ներկայացրել ՀՀ գլխավոր դատախազ Արթուր Դավթյանին՝ պահանաջելով վերացնել այն․ «Հույս ունենք, որ հետագա քննության ընթացքում»,- հավելեց Ֆերոյանը:
Մեր հարցին ի պատասխան՝ պաշտպանն ասաց, որ Նարեկ Կարապետյանը ցուցմունք է տվել եւ ասել է, որ որեւիցե անձից գումար չի պահանջել, սպառնալիքներ չի հնչեցրել: Նարեկ Կարապետյանը իր ցուցմունքում նաեւ նշել է, որ Վահե Պարազյանի հետ վիճաբանել է ընկերը՝ Տիգրան Ասլանյանը. «Վիճաբանությունը կապված է Տիգրան Ասլանյանի հետ, ինչ-որ քաշքուկի մեջ են ընկել, ինքը (Նարեկ Կարապետյանը) ընդամենը բաժանել ու փորձել է նրանց հաշտեցնել»,- շարունակեց մեր զրուցակիցը՝ հավելելով, որ Նարեկ Կարապետյանը Վահե Պարազյանին որեւէ գումարային պահանջ չի ներկայացրել: Պաշտպան Ֆերոյանը հաստատեց մեր այն տեղեկությունը, որ երեկ Նարեկ Կարապետյանն ու Վահե Պարազյանը առերես հարցաքննվել են: ՀՀ Քրեական դատավարության օրենսգրքի 216 հոդվածի համաձայն՝ քննիչը պարտավոր է կատարել առերեսում, եթե էական հակասություններ կան մեղադրյալի եւ մեկ այլ անձի ցուցմունքներում: «Այո առերեսվել են, Նարեկ Կարապետյաը պնդել է իր ցուցմունքը, Վահե Պարազյանը՝ իր»,- ասաց Արմեն Ֆերոյանը: Մեր դիտարկմանը, որ Վահե Պարազյանի պնդմամբ՝ Նարեկ Կարապետյանը իր թիկնապահներով է իրեն ծեծի ենթարկել, պաշտպանը արձագանքեց. «Թիկնապահ հասկացողություն գոյություն չունի»: Մեր հարցին ի պատասխան՝ պաշտպանն ասաց, որ տեղեկություն չունի՝ արդյոք դեպքի վայրում տեսախցիկներ եղե՞լ են, թե՞ ոչ:
Շարունակությունը՝ սկզբնաղբյուր կայքում