Անթույլատրելի է ցանկացած իրավիճակ, երբ ոստիկանության եւ առհասարակ իրավապահ ներկայացուցիչների նկատմամբ կիրառվում է ուժ ու չեն ենթարկվում իրավապահների օրինական պահանջներին: Այս մասին Իջեւանում լրագրողների հետ զրույցում ասել է ՀՀ ԱԱԾ տնօրեն Արթուր Վանեցյանը` անդրադառնալով երեկ տեղի ունեցած միջադեպին:
«Ստեղծված իրավիճակը իրոք մտահոգիչ է եւ 2018 թվականի մայիսից հետո երեւի թե առաջին դեպքն է: Պետք է ամեն ինչ արվի, որպեսզի մի կողմից պաշտպանվի մեր քաղաքացիների շահերը եւ երկրորդ կողմից ապահովվի օրենքի անվերապահ կատարումը: Իմ հիմնական այցելության նպատակը դա է: Հիմա մենք բոլորս գնալու ենք մարզպետարան՝ անցկացնելու ենք խորհրդակցություն մարզպետի եւ համայնքի ղեկավարների մասնակցությամբ, ինչպես նաեւ իրավապահ համակարգի ներկայացուցիչների մասնակցությամբ: Կարծում եմ, որ այսօր այս հարցի լուծումը վերջնական կտրվի եւ իջեւանցիները կվերադառնան նորմալ բնականոն կյանքին»,- ասել է Վանեցյանը:
Ավելի ուշ՝ տեղի ունեցած խորհրդակցությունից հետո ԱԱԾ տնօրենը լրագրողներին ասել է, որ երեկվա ակցիան ոչ թե ինքնաբուխ հավաք էր, այլ մի քանի անձանց կողմից կազմակերպված սադրանք. «Սադրանք էր, որը մեր մարզ այցելելուց եւ այս խորհրդակցությունն անցկացնելուց հետո ամենեւին չի նշանակում, որ մեղավորները չեն բացահայտվելու եւ չեն պատժվելու»։
Ոստիկանության հետ համատեղ աշխատանքի արդյունքում բոլորը կհայտաբերվեն ու կկանգնեն օրենքի առջեւ. «Այս խնդիրը ստանալու է լուծում, որը բավարարելու է թե՛ քաղաքացիներին, թե՛ պետությանը»,- նշել է Վանեցյանը:
«Տավուշի մարզը բացառիկ է իր անտառներով եւ մարզի համար դրանք կարող են օգտագործվել ավելի արդյունավետ, քան դրանք որպես փայտանյութ դիտելը»,- ասել է ԱԱԾ տնօրենը։
ԱԱԾ տնօրենը տավուշցիներին կոչ է արել այլեւս թույլ չտալ այնպիսի արարքներ, ինչպիսին եղավ երեկ։
«Բոլոր ծագած հարցերը կլուծեն մարզպետարանում ու համայնքի ղեկավարների հետ բանակցությունների արդյունքում։ Ես համոզված եմ, որ հաստատ կգտնեն լուծումներ»,- ասել է Վանեցյանը։
Դիտեք նաև՝
