2008թ. օգոստոսին Գ. Սունդուկյանի անվան ազգային ակադեմիական թատրոնի գեղարվեստական ղեկավար Վահե Շահվերդյանը մշակույթի նախարարի որոշմամբ հեռացվեց պաշտոնից: Այն ժամանակ Շահվերդյանին, ում համար նախարարի որոշումն անակնկալ էր ու խիստ անսպասելի, ասվեց ընդամենը հետևյալը` Թատրոնը չունի գեղարվեստական ղեկավարի հաստիքի կարիք, քանի որ այն պետք է բաց դաշտ դառնա բեմադրիչների համար:
«Եթե անգամ ես իրենց չէի բավարարում, կարող էին ուրիշին վստահել այդ պաշտոնը, բայց որդեգրվեց գեղարվեստական ղեկավարի հաստիքից ընդհանրապես հրաժարվելու քաղաքականություն, ինչն առ այսօր ինձ համար անընդունելի ու սխալ է»,-Asekose.am-ի հետ զրույցում նշեց բեմադրիչը:
Շահվերդյանի խոսքով` այդ իրադարձությունների ընթացքում և առ այսօր ինքը Տիգրան Գասպարյանի հետ (ներկայումս Սունդուկյանի անվան ազգային ակադեմիական թատրոնի գլխավոր ռեժիսորն է) որևէ կոնֆլիկտ չի ունեցել. «Տիգրան Գասպարյանի հետ երբեք կոնֆլիկտ չեմ ունեցել, կարծում եմ` ինքն էլ ինձ հետ որևէ կոնֆլիկտ չունի»:
Իսկ հարցին, որ որդու` Սուրեն Շահվերդյանի ներկայացումներն առ այսօր չեն ներկայացվում Սունդուկյանի բեմից, բեմադրիչը պատասխանեց. «Սուրենի ներկայացումները կատեգորիկ հանված են խաղացանկից, բայց դրան անդրադառնալ չեմ ուզում, անիմաստ է այդ խոսակցությունը, միայն կասեմ, որ շատ տաղանդավոր երիտասարդ բեմադրիչների կողքին Սուրենն ունի իր ուրույն տեղը, և եթե այսօրվա Մայր թատրոնը նրա անհրաժեշտությունը չունի, ապա դա թատրոնի խնդիրն է»:
Մշակույթի նախարարի մասին վերաբերմունքի, արվեստագետներին տրվող կոչումների, Մայր թատրոնից նոր բեմադրությունների առաջարկ չստանալու և բազմաթիվ այլ հարցերի շուրջ զրույցի ամբողջական հեռուստատարբերակը կարող եք դիտել կիրակի օրը ASEKOSE.am-ի «Բացարձակ արժեք» հաղորդման շրջանակներում:
