Արդեն տեղեկացրել էինք, որ երեկ` ՀՀԿ ԳՄ նիստում, վարչապետ Տիգրան Սարգսյանը հրաժարական է ներկայացրել: Էդուարդ Շարմազանովի խոսքով վարչապետը դեռ մեկ ամիս առաջ որոշում էր կայացրել հրաժարականի դիմում ներկայացրել, սակայն հարցը հետաձգվել էր Մաքսային Միության հետ բանակցությունների բնականոն ընթացքը չխաթարելու նպատակով:

Մեկնաբանելով իր որոշումը` Տիգրան Սարգսյանն ասել էր, որ այն հասունացած էր և խորը գիտակցված:

Տիգրան Սարգսյանի  հրաժարականի, դրա` Մաքսային միության կամ նրա մերձակա տարածքում երեք կառավարությունների փոփոխության զուգադիպության, վարչապետի պաշտոնի հավականորդների և այլ հարցերի շուրջ ASEKOSE.am-ի թղթակիցը զրուցել է քաղաքագետ Սերգեյ Մինասյանի հետ:

Վարչապետի հրաժարականը պատահականությո՞ւն էր, արդյոք այն կապ ունի՞  ՍԴ վերջին  որոշման հետ:

-Իրականում ես կարծում եմ, որ բավականին երկար ժամանակ երևում էր, որ վարչապետը խնդիրներ ուներ պաշտոնը երկար ժամանակ զբաղեցնելու հետ կապված: ՍԴ վերջին որոշումն ավելի շատ առիթ էր, քան պատճառ:

Վերջին մեկ ամսվա ընթացքում հրաժարական են տվել Ղազախստանի, Ղրղզստանի վարչապետերը: Արդյոք սա զուգադիպությո՞ւն է:

Սա իսկապես զուգադիպություն է: Այս խնդիրն ավելի շատ կապված է Հայաստանի ներքաղաքական, սոցիալական խնդիրների, այլ ոչ թե արտաքին գործոնների հետ:

Այսինքն, կառավարության փոփոխությունը Հայաստանում արտաքին քաղաքական գործընթացի հետևանք չէ:

Ոչ…տնտեսական զարգացման էֆեկտիվության հետ կապված խնդիրներ են:

Կարո՞ղ ենք ասել,  որ ՀՀ նախագահը շախմատային քայլով կանխեց քառյակի  ծրագրած  «շախ» հայտարարելու ծրագիրը:

Չեմ կարծում, որ դա դրա հետ կապված խնդիր էր: Սոցիալական և քաղաքական լարվածությունը դա ոչ թե ընդդիմադիր կուսակցությունների գործունեության պատճառն է, այլ դա օբյեկտիվ իրականություն է, որը կապված է և’ տարածաշրջանային դժվար համատեքստով և տնտեսական լարվածությամբ ու խնդիրներով, որոնք կան մեր երկրում: Բայց, մյուս կողմից, հասկանալի է, որ կատարվածը որոշ չափով կլիցքաթափի սոցիալական և քաղաքական լարվածությունը երկրում, մինչ  նոր վարչապետի նշանակվելը:

Արդեն շրջանառվում են վարչապետի պաշտոնի հավակնորդների անունները. Ռոբերտ Քոչարյան, Կարեն Կարապետյան, Ռալֆ Յիրիկյան: Հնարավոր համարո՞ ւմ եք:

Ոչ, ես չեմ կարծում, որ Ռոբերտ Քոչարյանը կարող է լինել վարչապետ: Սերժ Սարգսյանին կարելի է շատ բաների մեջ մեղադրել, բայց ոչ թե նրանում, որ պատրաստվում է քաղաքական ինքնասպանություն գործել: Ինչ-ինչ , ինքը շատ լավ հիշում է, թե ինչով են վերջանում բոլոր փորձերը, երբ որ Քոչարյանին նշանակում են վարչապետ:

Ճիշտ պատասխանը գիտի միայն մեկ հոգի: Նախագահը կարող է նշանակել վարչապետ` ելնելով իր սեփական, քաղաքական նպատակահարմարությունից: Դա կարող է լինել կուսակացական, ընդդիմադիր դաշտից: Նայած, թե ինչպես է պատկերացնում նոր վարչապետին, նրա պարտականությունները:

Անի Կարապետյան