Ֆուտբոլային հանրությունը ցնցված է իսպանական «Տեներիֆեի» 30-ամյա հարձակվող Խեսուս դե Միգելի ողբերգական մահվան լուրից։ Նա մահացել է  «Անդորրայի» դեմ խաղում ստացած ծանր վնասվածքի հետևանքով։ Ճակատագրական բախման անմիջական մասնակիցը՝ «Անդորրայի» դարպասապահ Խեսուս Օվոնոն, ծանր հոգեբանական վիճակում է և փորձում էր անձամբ կապ հաստատել մահացած գործընկերոջ ընտանիքի հետ։ Այսօր նա գրառում է կատարել սոցիալական ցանցերում ու նշել․ «Ես ամբողջովին կոտրված եմ երեկ խաղադաշտում տեղի ունեցածի պատճառով։ Այն, ինչ պետք է լիներ հերթական ֆուտբոլային հանդիպումը, վերածվեց մի ողբերգության, որը կմնա ինձ հետ ամբողջ կյանքում։ Ուզում եմ, որ բոլորը իմանան՝ ես երբեք չեմ ցանկացել որևէ մեկին վնասել։ Դա սարսափելի դժբախտ պատահար էր, մի բան, որը ամբողջ սրտով կուզեի հետ շրջել։ Ոչ մի բառ չի կարող արտահայտել այն ցավը, մեղքի զգացումն ու սրտի կոտրվածքը, որ հիմա զգում եմ։ Իմ խորին ցավակցություններն եմ հայտնում նրա ընտանիքին, ընկերներին, թիմակիցներին և բոլոր նրանց, ովքեր սիրել են նրան։ Ֆուտբոլն ինձ համար ամեն ինչ է, բայց ոչ մի խաղ, ոչ մի հաղթանակ և ոչ մի մրցակցություն երբեք չարժեն մարդկային կյանքին։ Ես իսկապես ցավում եմ։ Այս ամենը հավերժ կկրեմ իմ մեջ։ Հանգչիր խաղաղությամբ»։