Ռուսաստանի ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ հայտարարել է, որ Հայաստանի վարչապետ Նիկոլ Փաշինյանը ԵԱՏՄ-ին անդամակցության հարցում «բառային աճպարարությամբ» է զբաղվում։

Նրա խոսքով՝ Հայաստանի իշխանությունները պետք է նախ պարզեն սեփական ժողովրդի դիրքորոշումը Եվրասիական տնտեսական միության և Եվրոմիության միջև ընտրության հարցում, ապա միայն համապատասխան քայլեր ձեռնարկեն։
«Լսեցինք Նիկոլ Փաշինյանի հերթական բառային աճպարարությունն ու ԵԱՏՄ-ի և ԵՄ-ի միջև ընտրության վերաբերյալ հերթական դատողությունները։ Ոչ մի նոր բան։ Կրկին ժողովրդավարական ձևակերպումներ, Հայաստանի բնակչությանը մոլորեցնելու փորձ և որևէ կոնկրետություն չկա»,- նշել է Զախարովան։

***

ՀԱՊԿ կազմակերպությունում Հայաստանի անդամակցության շարունակման կամ դադարեցման հարցը կարող է քննարկվել Մոսկվայում կայանալիք ՀԱՊԿ գագաթնաժողովում, հայտարարել է ՌԴ ԱԳՆ ներկայացուցիչ Մարիա Զախարովան։

Նա հավելել է՝ Հայաստանը հնարավորություն ունի մնալու ՀԱՊԿ կազմում, սակայն եթե չի ցանկանում, ՀԱՊԿ գործընկերներից ոչ մեկն էլ նրան «ուժով չի պահի», թեպետ Հարավային Կովկասում, ՀԱՊԿ-ից բացի, ոչ մի այլ կառույց կամ միավորում չի կարող անվտանգության ճարտարապետություն կերտել, այնտեղ ՀԱՊԿ-ին այլընտրանք գոյություն չունի։

«Արևմտյան երկրներն ու դաշինքները, որոնք ամեն կերպ փորձում են ներթափանցել հարավկովասյան տարածաշրջան՝ պարտադրելով ռազմական կառավարման իրենց չափանիշները, պարզապես ի վիճակի չեն և չեն էլ պատրաստվում ապահովել կայունություն այդ տարածաշրջանում, այդ թվում՝ հաշվի առնելով աշխարհագրական գործոնները։ Թեպետ նրանց քաղաքական խնդիրներն ու նպատակներն էլ լրիվ հակառակի մասին են»,-նշել է ՌԴ ԱԳՆ ներկայացուցիչը։