Պատմաբան Արեգ Սավգուլյանը ֆեյսբուքյան իր էջում գրել է․ «Սաշա Լյովայի Կատվալյանը Մալաթի-Սեբաստիա վարչական շրջանի ղեկավարն է, իսկ կինը՝ Շուշանիկ Ասիլբեկի Ղևոնդյանը, Երևանի Լյովա Կատվալյանի անվան N 86 մանկապարտեզ ՀՈԱԿ-ի տնօրենը։ Այսօր լրագրողի հարցին ի պատասխան՝ թաղապետն ասում է, որ անհամատեղելիության խնդիր չկա, որ կինը միակ թեկնածուն է եղել, մրցույթում հաղթել է և նշանակվել է տնօրեն։ Եվ մինչ իր նշանակումն է այդ ամենը եղել (2024 թ.)։ Ընդունեցինք ի գիտություն։
Մի կողմ թողնենք որ տիկնոջ նշանակման պահին, Ս.Կատվալյանը 2024-2026թթ. զբաղեցրել է «Երևանի աղբահանություն և սանիտարական մաքրում» (ԵԱՍՄ) համայնքային հիմնարկի տնօրենի պաշտոնը և բնականաբար կարող էր բարեխոսել, անգամ մոռանանք, որ նա ՔՊ-ը անդամ է և ընդունենք, որ նաև նրա կինը ունեցել է բոլոր որակները թե՛ մասնագիտական, թե՛ աշխատանքային և թե՛ կառավարչական անրաժեշտ հմտությունները։ Գուցեև մեզ օգնության հասնի գրբաց տիկին Մանուշը և պատգամի, որ այս ամենը մարգարեական նախապատմություն ունի, կամ որոշակի օբյեկտիվ նախախնամությամբ է պայմանավորված կամ թավշա հեղափոխության սուբյեկտիվ հետևանքներով և իրավունքի ուժով, և այլն, և այլն և այլն։
Թաղապետ Ս.Կատվալյանը մոռանում է, որ անկախ վերոնշյալից միանշանակ առկա է շահերի բախում, որովհետև ինքն այժմ ունի վերադասի կարգավիճակ և կարող է օրինակ հանձնաժողով ստեղծել և ստուգել իր կնոջ ղեկավարած հիմնարկի գնումները, եղն ու բրինձը (օրվա քանակը), սաների թիվը, սանիտարական վիճակը և այլ բազմաթիվ հարցեր։ Ավելին՝ նման դեպքերում կոլեկտիվը հլու-հնազանդ կհամախմբվի տնօրենի կողքը և որևէ մեկի մտքով չի անցնի առարկել, հակաճառել կամ բողոքել տնօրենից, որովհետև վերևից ներքև փոխշաղկապված է։
Գուցե համայնքային կանոնադրությանը այս «ամուսնական տանդեմը» չի հակասում, բայց շահերի բախումն ակնհայտ է, ավելին անգամ կոռուպցիոն ռիսկեր կարող են լինել։ Կա՛մ թաղապետը պետք է հրաժեշտ տա իր պաշտոնին, կա՛մ նրա տիկինը։
Հ.Գ. Ի դեպ վերջերս էլ երկու տարբեր նախարարություններում նույն օրը փաթեթային ձևաչափով ամուսիններ նշանակվեցին որպես փոխնախարարներ»։

***

«Որևէ մեկին աշխատանքից չեմ ազատել։ Երբ նշանակվեցի և եկա թաղապետարան, մոտ 10 աշխատակից արդեն ազատման դիմում էր գրել՝ առանց իմ որևէ ներգործության․․․ Որոշ աշխատակիցների նկատմամբ կիրառվել են կարգապահական տույժեր»,- այս մասին լրագրողների հետ ճեպազրույցում նշել է Մալաթիա-Սեբաստիա վարչական շրջանի նորանշանակ ղեկավար Սաշա Կատվալյանը՝ անդրադառնալով վարչական շրջանի աշխատակազմում կադրային ջարդի մասին շրջանառվող լուրերին։

Անդրադառնալով իր կնոջ պաշտոնավարմանն ու շահերի հնարավոր բախմանը՝ Կատվալյանը նշեց. «Իմ կինը մրցույթով է դարձել թիվ 86 մանկապարտեզի տնօրեն, երբ ես դեռևս չէի նշանակվել Մալաթիա-Սեբաստիա վարչական շրջանի ղեկավար։ Անցել է լիցենզավորման փուլը, ստացել համապատասխան հավաստագիր։ Նա եղել է մրցույթի միակ մասնակիցը և ճանաչվել է հաղթող։ Այստեղ որևէ խնդիր չկա»։