Աջափնյակում օրեր առաջ տեղի ունեցած դաժան սպանության մեջ մեղադրվում են Երիցյան ամուսինները։ «Փաստինֆո»-ի տեղեկություններով՝ դաժան սպանությունն սկիզբ է առել նախկինում ունեցած գույքային վեճի շուրջ առաջացած վիճաբանությունից: Հունվարի 31-ին առավոտյան ամուսիններ Բախշի և Էլմիրա Երիցյանները, ոմն Ռաֆիկ Մկրտչյանի ավտոմեքենայով Հրազդանից ուղևորվել են Աջափնյակում բնակվող 69-ամյա Արշավիր Բարսամյանի տուն՝ նրա հետ նախկինում ունեցած գույքային վեճի շուրջ զրուցելու: 

Հարցերի պարզաբանումը քաղաքակիրթ ձևով չի ստացվել, վիճաբանություն է առաջացել և Բախշի Երիցյանը «գործի է դրել» մուրճը,  բազմաթիվ հարվածներ հասցնելով Արշավիր Բարսամյանի գլխի և դեմքի տարբեր մասերին: Ստացած հարվածներից տղամարդն ընկել է մահճակալին և օգնություն կանչելու նպատակով բղավել, սակայն այստեղ էլ Էլմիրա Երիցյանն է գործի անցել՝ մարմնով ընկել է նրա վրա, բռնել, իսկ ամուսինը շարունակել է մուրճով հարվածներ հասցնել՝ Արշավիր Բարսամյանին դիտավորությամբ զրկելով կյանքից: Հանցավոր արարքը թաքցնելու նպատակով սպանված տղամարդու տանը գտնվող 3 անձինք դիակի ձեռքերից և ոտքերից բռնելով տեղափոխել են խոհանոց՝ դիակը բնակարանի նկուղում թաքցնելու նպատակով, սակայն բռնվել են ոստիկանության աշխատակիցների կողմից:

Երիցյան ամուսինները կալանավորված են եւ մեղադրվում են ՀՀ քրեական օրենսգրքի  104-րդ հոդվածի 2-րդ մասի 7-րդ կետով: