«Ինձանից էլ լավ գիտեք մարդկանց վերաբերմունքը Ռոբերտ Քոչարյանի հանդեպ, նրա վարկանիշը, բոլորս գիտենք։ Հորդորում եմ Ռոբերտ Քոչարյանի և Սերժ Սարգսյանի մասին խոսելիս չօգտագործել նախագահ բառը, որովհետև նրանք երբևէ չեն ընտրվել որպես նախագահ»,- այսօր լրագրողների հետ զրույցում ասաց ԱԺ փոխնախագահ Ալեն Սիմոնյանը՝ անդրադառնալով Ռոբերտ Քոչարյանի հայտարարությանը, ըստ որի՝ ինքը պատրաստվում է միանալ ՀՀ-ում ձևավորվող ընդդիմադիր քաղաքական ուժերին:

Հիշեցնենք, որ Հայաստանի պաշտոնաթող նախագահ Ռոբերտ Քոչարյանը, որը Մարտի 1-ի գործով մեղադրվում է սահմանադրական կարգի տապալման համար, բանտից Reuters գործակալությանը տված գրավոր հարցազրույցում հայտարարել է, որ հզոր ընդդիմադիր ուժեր միավորվում են՝ մարտահրավեր նետելու Հայաստանի նոր իշխանություններին: Քոչարյանը Reuters-ին ասել է՝ հույս ունի, որ ինքը այդ ուժերի թվում կլինի:

Կալանավայրից տված հարցազրույցում Քոչարյանը կրկին պնդել է, որ իր դեմ առաջադրված մեղադրանքները քաղաքական են, և մեղադրել է վարչապետ Նիկոլ Փաշինյանին ընտրովի արդարադատություն իրականացնելու մեջ: Նախկին նախագահը պնդել է, որ Հայաստանում նոր քաղաքական գործիչներ և ընդդիմադիր ուժեր են ձևավորվում:

Կարդացեք նաև՝ Մտադիր եմ միանալ ՀՀ նոր իշխանությունների դեմ պայքարին. Ռոբերտ Քոչարյան