Այսօր ԱԺ քառօրյայի հերթական նիստի ընթացքում ԱԺ պատգամավոր Նիկոլ Փաշինյանը, խոսելով բյուջեի կատարողականի մասին նաև որոշ վիճակագրական տվյալներ է ներկայացրել` մասնավորապես նշելով, որ  2012-2013 թթ ուստարվա ընթացքում  Հայաստանում դպրոցների աշակերտների թիվը  նվազել է  մոտավորապես 18 հազարով:  Ընդ  որում`2011-2012 թթ Հայաստանից գնացել է 5081 աշակերտ, իսկ 2012-2013 թթ`  4787 աշակերտ:   Պատգամավորի  խոսքով` աճել է նաև ինքնասպանությունների թիվը:

Շարունակելով ելույթը` Նիկոլ Փաշինյանը մասնավորապես ասել է.

«Հանրությունն ահազանգում էր, ասում էր` էն մարդուն որ պահում եք  Սյունիքի մարզպետի կարգավիճակում, դոշից մեդալներ եք կախում, այդ մարդը չարիք է: Ասում էին` հերյուրանք է, համոզվեցինք,  որ «հերյուրանք» էր: Ասում էին, որ  Ներսես նազարյանը գեներալական «պագոնների»  տակ բիզնես է անում, ասում էին` հերյուրանք է: Այսօր մամուլում կարդացինք,  թե ինչպես են  Ներսես Նազարյանի որդուն դիմավորել օդանակավակայնում, հերթական «հերյուրանքն» էր:  Ասում էին` ՊԵԿ-ի նախագահի համար ՊԵԿ-ը դարձել է բիզնեսի տանիք, ասում էին` հերյուրանք է:  Նա ոչ մի բիզնես չունի, բոլոր բիզնեսները նրա որդունն են, եղբորորդունը:  Բոլորը միլիոնատերեր  են, բոլորը. արդար ձևով դարձել են միլիոնատեր»:

Եզրափակելով ելույթը` Նիկոլ Փաշինյանը հայտարարել է, որ դեմ է քվեարկելու բյուջեի կատարողականին,  քանի որ ի դժբախտություն ոմանց` ինքը կարողանում է տարբերակել հերյուրանքը իրականությունից: