Չեմ մասնակցում Երևանի քաղաքապետ Հայկ Մարությանին անվստահություն հայտնելու որևէ գործընթացի:
Այս մասին իր ֆեյսբուքյան էջում գրել է Երեւանի ավագանու «Իմ քայլը» խմբակցության անդամ Գրիգոր Երիցյանը:
«Ավելին՝ անվստահություն հայտնելու պատճառ չունեմ: Դրական եմ գնահատում քաղաքապետի աշխատանքը և կարծում եմ, որ նա արդյունավետորեն կյանքի է կոչում երևանցու առաջ ստանձնած իր պարտավորությունները: Առայժմ այսքանը»,- գրել է նա:
Նշենք, որ Երևանի քաղաքապետ Հայկ Մարությանին անվստահություն հայտնելու գործընթացին չեն մասնակցել «Իմ քայլը» խմբակցության անդամներ Օվսաննա Հովսեփյանը և Վահե Գևորգյանը, ավագանու անկախ, «Իմ քայլը» խմբակցության նախկին անդամ Իզաբելլա Աբգարյանը:
Օվսաննա Հովսեփյանը NEWS.am-ին ասել է, որ չի միացել Երևանի քաղաքապետ Հայկ Մարությանին անվստահություն հայտնելու գործընթացին:
«Ճիշտն ասած ես այս պահին ֆիզարձակուրդի մեջ եմ գտնվում, բայց այդ գաղափարին չեմ միանում»,- նշել է նա և չի ցանկացել մանրամասնել պատճառների մասին։
«Իմ քայլը» խմբակցության անդամ Վահե Գևորգյանը ֆեյսբուքյան էջում գրել է, որ ավագանին ֆորմալ կարող է քաղաքապետ փոխել, բայց երևանցիներն ուզու՞մ են փոխել.
«Ես, որպես ավագանու անդամ ոչ մի ստորագրություն չեմ տվել, չեմ էլ տալու, անվստահություն հայտնելու պատճառ չունեմ, և Համարում եմ, որ դա չի բխում Երևան քաղաքի շահերից։ Ուզում եմ հիշեցնել, որ քաղաքպետի մանդատը առաջնային մանդատ է, ընտրվել է ուղիղ Երևան քաղաքի բնակիչների կողմից։ Ավագանին ֆորմալ կարող է քաղաքապետ փոխել, բայց Երևանցիներն ուզու՞մ են փոխել»,- գրել է նա։
