Կառավարության նիստում ընդունվել է «Երևանի թատրոնի և կինոյի պետական ինստիտուտ» պետական ոչ առևտրային կազմակերպության ռեկտորի ընտրության արդյունքները հաստատելու մասին» ՀՀ կառավարության որոշման նախագիծը:
Կրթության, գիտության, մշակույթի և սպորտի նախարար Արայիկ Հարությունյանն ասաց, որ նախագծով առաջարկվում է հաստատել «Երևանի թատրոնի և կինոյի պետական ինստիտուտի» ռեկտորի պաշտոնում ընտրված Լիլիթ Արզումանյանի ընտրության արդյունքները՝ 5 տարի ժամկետով:
«Մայիսի 22-ին բուհի կառավարման խորհրդի նիստում, որին մասնակցում էին խորհրդի բոլոր 24 անդամները գաղտնի քվեարկության արդյունքում բանասիրական գիտությունների դոկտոր Լիլիթ Արզումանյանը ստացել է 14 կողմ , 9 դեմ ձայն, 1 քվեաթերթիկ ճանաչվել է անվավեր: Հիշեցնեմ նաև, որ 2013-18թթ տիկին Արզումանյանը գլխավորել է Բարձարձրագույն որակավորման հանձնաժողովը, բայց նա նաև սերտ կապ է ունեցել արվեստի ոլորտի հետ, մասնավորապես 1990-93թթ վարել է Հանրային հեռուստաընկերության «Թատերական հյուրասենյակ» և «Մեր թատրոնը» հեղինակային հաղորդաշարերը, մի շարք խաղարկային ֆիլմերի հեղինակ է: Եղել է լեզվի բարձրագույն խորհրդի անդամ, ինչպես նաև մի շարք գեղարվեստական խորհուրդների անդամ»,-նշել է նախարարը:
Լիլիթ Արզումանյանը շնորհակալություն է հայտնել վստահության համար և գոհունակություն, որ այսօր մասնակիցն է լինում երկիրը նորից «սարքելու» գործընթացին. «Ուզում եմ շնորհակալություն հայտնել կառավարությանը:Ես խնդրել էի պարոն Հարությունյանից կառավարության օգնությունը, քանի որ ինստիտուտը շատ վատ վիճակում է: Կառավարության որոշմամբ մեզ հատկացվեց գումար՝6 մլն դրամ: Այն արդեն ձեռք ենք բերել և շենքի 70 տոկոսն արդեն վերանորոգված է»: Հարությունյանն էլ ավելացրեց, որ ինստիտուտում տեխնիկական և բովանդակային խնդիրներ կան.«Այս ընթացքում արդյունավետ համագործակցել ենք տիկին Արզումանյանի հետ և որոշ հարցերի լուծումներ տվել ենք: Անձամբ հանդիպումներ եմ ունեցել նաև ուսանողների հետ և լսել եմ նրանց առաջ քաշած խնդիրները, որոնց մի մասն օբյեկտիվ են և համապատասխանում են իրականությանը: Մենք պայմանավորվել մենք, որ առաջիկա ամիսներին կգտնենք այդ հարցի լուծումները»:
Վարչապետն էլ Արզումանյանին հիշեցրել է, որ ինստիտուտի շրջակայքը մաքրել է 1-2 ամիս առաջ և հույս ունի, որ այդ մաքրությունն այնտեղ կպահպանվի:
Կառավարությունը հաստատել է Արզումանյանի ընտրության արդյունքները: