nrnak.com-ի փոխանցմամբ Երևանում սնկի պես աճող դեղատների գործունեությունը միշտ չէ, որ համապատասխանում է ՀՀ առողջապահության նախարարության կողմից հաստատված չափանիշներին: Շատ դեպքերում դեղատների սեփականատերերը օրինախախտ գործունեություն են ծավալում: Մասնավորապես որոշ դեղատներ վաճառում են մաքսանենգ ճանապարհով Հայաստան ներմուծված դեղամիջոցներ, որոնց մասին տեղեկություններ չունեն ո՛չ առողջապահության նախարարության համապատասխան մարմինները, ո՛չ էլ գնորդները:
Օրեր առաջ կայքի խմբագրություն ահազանգ է ստացվել Երևանի մի շարք դեղատներում ազատ կերպով չգրանցված դեղեր վաճառելու վերաբերյալ:Նշել են, որ մասնավորապես խախտումներ են նկատվել Տիգրան Մեծ 17 հասցեում գտնվող «ԼԱՎԱՆԴԱ» դեղատանը: Կայքի լրագրողին հաջողվել է ձեռք բերել «Бромкамфора» անունը կրող դեղը, որը, ինչպես ՀՀ առողջապահության նախարարույթան հավաստմամբ, ՀՀ-ում համարվում է չգրանցված դեղորայք, այսինքն հանրապետություն է մուտք գործում մաքսանենգ ճանապարհով: ՀՀ առողջապահության նախարարության աշխատակազմի ղեկավար Սուրեն Քրմոյանը նշել է, որ նման օրինախախտումների համար նախատեսված է վարչական տույժ նվազագույն աշխատավարձի հարյուրհիսունապատիկի չափով:
Կայքը գրում է, որ նման օրինախախտումներ կան երևանյան այլ դեղատներում ևս, սակայն մինչև օրս որևէ մեկը չի պատժվել, որևէ մեկը չի ենթարկվել վարչական պատասխանատվության: Որովհետև ինչպես ներկրողներից, այնպես էլ սեփականատերերից շատերը գործում են ոչ առանց «դաբրոյի»:
Առավել մանրամասն`սկզբնաղբյուր կայքում:
