Նիկոլը ցավն ու վիշտը ամենօրյա ռեժիմով վաճառում է ռազմագերիների ծնողների վրա։ Այս մասին ֆեյսբուքյան գրառում է արել ԱԺ ԲՀԿ պատգամավոր Նաիրա Զոհրաբյանը։
«Ադրբեջանի արտգործնախարար Բայրամովը ՄԱԿ-ի գլխավոր քարտուղար Անտոնիո Գուտերեշին ուղղված նամակում, արդեն պատերազմից հետո Հադրութի շրջանում գերեվարված 62 զինվորներին ներկայացրել է որպես դիվերսանտներ:
Իսկ դա միջազգային իրավունքով նշանակում է, որ Ադրբեջանը նրանց չի համարում ռազմագերիներ և կարող է դատել: Վստահաբար գերեվարվածները Շիրակի մարզի զինվորների հայտնի խումբն է, որոնց ծնողներին նիկոլական իշխանությունը խաբում է աննախադեպ ցինիզմով:
Չի բացառվում, իհարկե, որ մեր գերեվարվածները Ալիևի համար վալյուտա են, որոնց նա պատրաստ կլինի փոխանակել Հայաստանից հերթական տարածքային զիջումների դիմաց: Դա պարզ կլինի ամսի 11-ից հետո, երբ նա կստորագրի հերթական դավաճանության սեւ թուղթը։
Իսկ ամենազարհուրելին գիտե՞ք որն է:
Որ Նիկոլը ցավն ու վիշտը ամենօրյա ռեժիմով վաճառում է ռազմագերիների ծնողների վրա: Վաճառում է` օգտագործելով ծնողների անհուսությունն ու ամեն գնով իրենց որդիներին վերադարձնելու ցանկությունը:
Որևէ անգամ, ո՛չ պատերազմի օրերին ու ո՛չ էլ հիմա, Նիկոլի խոսքում կամ ինքնաարդարացման իր էպիստոլյալ սուբլիմացիաներում չկար ցավ ու ափսոսանք: Չկար զղջում: Չկար կարեկցանք զոհված ամենապայծառ ու գժվելու լավ հազարավոր տղաների համար:
Նա սպանեց մի քանի սերունդ ու շարունակում է ամեն օր սպանել իրենց որդիներին փնտրող ծնողներին:
Ու շարունակում է ծնողների վրա վաճառել իրենց իսկ ցավն ու վիշտը»,– գրել է նա:
