«Նախ՝ խրախճանք չի կազմակերպվել, որքանով տեղյակ եմ՝ միջոցառման առանցքային շահառուներից են եղել պատերազմում զոհված զինծառայողների մայրերը։ Միջոցառումը ծրագրված է եղել 5-6 ամիս առաջ՝ նվիրված զոհվածների մայրերին ամոքելուն, սփոփելուն, նրանց կողքին լինելուն»,- Աննա Հակոբյանի մասնակցությամբ «Սև ու Սպիտակ» խնջույքի մասին հարցին ի պատասխան՝ ասաց Նիկոլ Փաշինյանը։

***

Բագրատ Սրբազանն անդրադարձավ Փաշինյանի խոսքին, թե Աննա Հակոբյանի մասնակցությամբ «Սև ու սպիտակ» խնջույքը խրախճանք չի եղել, այլ միջոցառում, որի շահառուները զոհված զինծառայողների ծնողներն են եղել։ «Կեղծ պատրվակ են բռնել՝ ասելով, որ շահառուն զոհվածների ծնողներն են, ամո՛թ ձեզ։ Էդ նույն զոհվածների մարմինները տոպրակների մեջ եք պահել, տո դուք ի՞նչ գործ ունեք զոհված զինծառայողների հետ, ի՞նչ իրավունք ունեք նրանց մասին խոսելու։ Երբ պետք է, զոհվածների անուններն օգտագործում եք, երբ պետք է՝ ծնողներին ծեծում ու ջարդում եք։ Էսքան երեսպաշտություն որտեղի՞ց»,- ասաց Բագրատ Սրբազանը։