Ռուսական թելեգրամ-ալիքը, որը մոտ է իրավապահ համակարգերին, հրապարակել է Մոսկվայի ահաբեկչության ենթադրյալ իրագործողների լուսանկարները: Ըստ «ВЧК-ОГПУ» թելեգրամ-ալիքի` նրանցից առնվազն 3-ն Ինգուշեթիայից են:
Թարմացված․ Crocus City Hall-ը պատկանում է ադրբեջանցի մեծահարուստ Արազ Աղալարովին՝ Ադրբեջանի նախագահ Իլհամ Ալիևի դուստր Լեյլա Ալիևայի նախկին ամուսնու հորը։ Նա իր որդու հետ ժամանել է դեպքի վայր։ Գրում են ռուսական ԶԼՄ-ները։
Հիշեցնենք՝ ՌԴ ԱԴԾ-ի նախնական տվյալներով՝ Crocus City Hall-ում տեղի ունեցած ահաբեկչության հետևանքով զոհվել է 40 մարդ, ավելի քան 100-ը վիրավորվել են։
Թարմացված․ Նիկոլ Փաշինյանը ցավակցական հեռագիր է հղել Ռուսաստանի Դաշնության նախագահ Վլադիմիր Պուտինին Մոսկվայում տեղի ունեցած ահաբեկչության կապակցությամբ։ Այս մասին հայտնում է ՀՀ վարչապետի աշխատակազմը։
Հեռագրում ասված է.
«Հարգելի Վլադիմիր Վլադիմիրի,
Անկեղծ վշտակցությամբ ընդունեցի Մոսկվայում տեղի ունեցած և անմեղ մարդկանց կյանքեր խլած ահաբեկչության ողբերգական լուրը։
Հայաստանը խստորեն դատապարտում է այս անմարդկային հանցագործությունը խաղաղ բնակչության դեմ։
Խորին ցավակցություններս եմ հայտնում Ձեզ։ Մենք սգում ենք Ռուսաստանի ժողովրդի հետ միասին և վշտակցության ու զորակցության խոսքեր ենք հղում անդառնալի կորուստ կրած զոհերի ընտանիքների անդամներին և հարազատներին»։
