Օգոստոսի 11-ին, Տավուշի մարզի Հաղարծին համայնքում իր ելույթի ժամանակ ՀՀ վարչապետ Նիկոլ Փաշինյանը ասաց.
«Այսօր Հաղարծինը չի կարող ապրել այնպես, ինչպես ապրում էր մեկ ամիս առաջ, կամ երեք ամիս առաջ:
Ասեմ, որ ես մայրական կողմից Հաղարծինի թոռ եմ, Ջարխեչի թոռ եմ: Ես ուզում եմ մեզ բոլորիս շնորհավորել Հաղարծինի 200-ամյակի կապակցությամբ: Եվ, այսօր ուզում եմ, որ 200-ամյակը Հաղարծինի համար նոր էջ բացի, ինչպես, ընդհանրապես, 2018 թվականը Հայաստանի հանրապետության եւ քաղաքացու կյանքում նոր էջ է բացել»,-ասել է նա:
Վարչապետի խոսքով` Հաղարծինը և Տավուշի մարզը շատ երկար տարիներ դժվարությունները հաղթահարել է անտառի շնորհիվ` անտառը հատելով և վաճառելով, սակայն հիմա պետք է փոխել այդ տրամաբանությունը:
«Հիմա եկել են ժամանակներ, երբ մենք ուզում ենք ցույց տալ, որ անտառը չկտրելը ավելի մեծ շահույթներ կարող է բերել մեր ժողովրդին, քան թե անտառը կտրելը»,-ասաց նա:
Վարչապետն ասաց, որ ինքը դատարկաձեռն չի եկել եւ նվեր ունի Հաղարծինի համար, այն է` 140 հազար դոլարանոց մի ծրագիր:
«Էդ ծրագրով կֆինանսավորվեն Հաղարծին գյուղի այն բնակիչները, ովքեր կներկայացնեն նորովի ապրելու, իրենց կյանքը կառուցելու ծրագիր, ովքեր կորոշեն` առանց բնությանը վնասելու նոր գործունեություն սկսել, չգիտեմ չրանոց բացել, անասնապահությամբ զբաղվել:
Եվ ուզում եմ շեշտեմ` դա լինելու է ոչ թե վարկ, դա լինելու է գրանտ, այսինքն` նվեր, որ մարդիկ նոր էջ բացեն: Ես ձեզ բոլորիդ կոչ եմ անում անջատել «դրուժբաները» և միացնել միտքը»,- ասաց նա: